Shillong, Naitung 05: Ka Nongaiktien ka sorkar MDA bad Myntri Sorkar kong Ampareen Lyngdoh kala ong ba ka sorkar jylla ka ieng skhem ba kan nym shah pyntreikam iaka Uniform Civil Code (UCC) ha Meghalaya.
“Kum ka Jylla ngi la ioh sngew iaka jingkren u Myntri Rangbah ka jylla baka sorkar ka ieng skhem halor kane, ngin nym don bynta ban pyntreikam iaka UCC ha Meghalaya” ong ka kong Ampareen.
Ka kong Ampareen kaba khmih ruh iaka tnat Law kala iathuh ba haduh mynta ka sorkar lane ka tnat kam pat ioh jingtip la ka sorkar jylla ka la ioh jingbthah ne em ban phah ia ki jingai jingmut halor ka UCC.
Ka Myntri ka ong ba ka sngewthuh ba ki don ki elekshon ha kiwei ki jylla bad dei namar kane ba ki don nongialam kiba la kren halor ka jingpyntreikam iaka UCC bad ha ka juh ka por ki don ruh kiba la kren pyrshah ia ka.
Kala ong “U Myntri Rangbah ula kren shai halor kane. Ngi la kren ba kane kadei ka Jylla kaba ioh ia ka jingithuh kyrpang. Lah iada ia ngi daka khyrnit ba hynriew kaba iada iaka jinglong kyrpang ka khyndew ka shyiap, ka riti dustur, ka jingiathoh ka jinghiar pateng bad kiwei kiwei”.
Haba pynpaw ba kane ka dang long kloi palat ka kong Ampareen kala ong “Ka dang kloi palat ban kren halor kane namar katkum ka jingtip jong nga kane ka dei ka Bill shimet (Private Member Bill) ban rah sha Rajya Sabha kaba mut haduh mynta ia kane ka Bill ym pat iakren hapoh ka ïing dorbar.
Ka kong Ampareen kala ong ba ka NDA bad ki paralok ki hap ban iakren halor kane la kadei ka mat jong ki ne em hynrei kala pynpaw ruh ba ka Meghalaya kan iakhun tyngeh ba kane ka Bill kam dei ban ktah iaka jinglong kyrpang ka Meghalaya.
Pule lang ia kane: Rai ka KHADC, Khlieh Nongsynshar bad Sengbhalang ban pyrshah jur ia ka UCC
