Shillong, Naiwieng 06: Ka Myntri ka Koit ka Khiah Kong Ampareen Lyngdoh hynne ka sngi Nyngkong kala ong ba ka Sorkar Jylla kan jied ia ka kompani kaba bha na kaba bha tam ban pyniaid ia ka 108 EMRI hapoh ka Jylla.
Haba iakren bad ki lad pathai khubor, ka Myntri kala ong “ Ngin ym shah pynthame ha ki jingiapynksan jong ki kompani kiba iaknieh namar ngi don hangne ban jied ia kaba bha na kaba bha tam. Ki jingkynnoh, ki jingiapynksan kan ym lah ban pynbeit iaki jingeh”.
“Ngi don hangne ban ai ia ka jingshakri ki ambulance kaba biang tam ia ki paidbah ka Jylla Meghalaya. Ka 108 EMRI kala shah mad ia ki jingtynjuh kiba bunha ki snem bala leit noh bad ngam kwah ban iadon bynta ha kum kine ki kam ka ban ktah ia ka Sorkar” kala ong.
Ka Myntri kala ong “Ka jingkyrpad jong nga ia ki kompani ba kin pynbeit ialade ha kaban long adkar. Ap ia ki jingjied ban sa pyndep bad sngewbha wat leit sha ki lad pathai khubor da ki jingujor namar ka miej ban ujor ka dei ka tender committee. Leit sha ka Committee”.
Ka Myntri kala bthah ruh ia ki kompani ba kin kiar na ka jingpyn kulmar jingmut halor ka rukom jied ia ka kompani ka ban shimti ban pyniaid ia ka 108 EMRI hapoh ka Jylla.
