Shillong, Naitung 15: Kum ka sienjam ban pyniar bad pynshlur ia ka jingpyndonkam ia ka ‘Renewable Energy’ ne ka bor ding ba pynmih na ki bor ka mariang , ka Meghalaya New & Renewable Energy Development Agency (MNREDA) kala sdang ia ka kam ban pyndait ia ki Solar Power System ha ki 63 tylli ki jaka lyngba ka BharatNet Phase-1 ha kylleng ki jaka jong ka jylla.
Ia kine ki jingpyndait kadei kaba dang iaid mynta shakhmat kaban kynthup ruh ia ki skul sorkar, ki Integrated Child Development Services (ICDS) Centre bad ki Community Hall.
Kane ka sienjam kadei da ka jingthmu ban pynthikna ba kan don ka jingioh iaka bording elektrik ka bym thud ia ka BharatNet, kaba long kaba kongsan ban pynbha ia ka jingpyniasoh ia ki kor Digital ha ki thain nongkyndong.
Napdeng ki 63 tylli ki jaka, ka jingpynbiang ia ka bording lyngba ka bor jong ka sngi kala iaid shakhmat ha ki 22 tylli ki skul sorkar, katba ha ki jaka kiba dang sah pat ki kynthup ia ki 8 tylli ki skul, 4 tylli ki ICDS Centre bad 29 tylli ki Community Hall, ka jingpyndait ia kitei kala iaid mynta shakhmat.
Nalor kane, ka BharatNet-linked Solar Rollout, MNREDA kala sdang ia ka jingpyndait ia ki solar light lyngba ka Chief Minister’s Solar Mission. Ha East Garo Hills, kila don baroh 125 tylli ki skul kiban ioh ia ka bording na ka bor jong ka sngi ha kaba yn pyndonkam ruh ia ki Off-Grid Inverter Systems, kaba 72 tylli ki skul kin ioh ia ka 1.1 kVA Systems bad 53 tylli ki skul kin ioh ia ka 2.2 kVA systems. Ia katei kajuh ka projek la khmih ba kan sdang sa ha East Jaintia Hills, ha kaba 123 tylli ki lower primary schools kin ioh ia ka bording na ka sngi, 72 tylli kin ioh ia ka 1.1 kVA System bad 51 tylli kin ioh ia ka 2.2 kVA System.
Ki jingpyrshang kila iaid shakhmat ban wanrah iaka Solar Power ha ki iing kiba don ha ki thain nongkyndong lyngba ka Pradhan Mantri Awas Yojana (PMAY). Ha East Khasi Hills, khamtam ha ka Mylliem Block, la iaid ban pyndiat ia ka Hybrid Solar Inverter System na ka bynta ki 492 ngut kiba ioh jingmyntoi. Kine ki kynthup ia ki 352 tylli ki Hybrid Solar Inverter System kaba 0.85 kVA bad 140 tylli ki Hybrid Solar Inverter System kaba 1.7 kVA.
Ka jingpyndait kan sa sdang noh shen ha North bad East Garo Hill na ka bynta ki 354 ngut ki nongioh jingmyntoi, kaban kynthup ia ki 253 tylli ki Hybrid Solar Inverter System kaba 0.85 kVA bad 101 Hybrid Solar Inverter System kaba 1.7 kVA.
Ka sorkar kala ioh ia kine ki sienjam kum shi bynta jongka jingkular ka jongka ban kynthup ia ki thain nongkyndong ban ioh ia ka roi ka par lyngba ka jingpyndonkam ia ka bording kaba khuid. Da ka jingpynbha ia ka bording bad ka jingai jingshakri lyngba ki kor Digital, la khmih lynti ba kine ki projek kin kyntiew ia ka rukom im ha ki thain nongkyndong jong ka jylla Meghalaya ha kaba kyrshan ia ka thong kaba iadei bad ka mariang bad ka jingpynkup bor ha ka ioh ka kot.
 kala sdang ia ka kam ban pyndait ia ki Solar Power System ha ki 63 tylli ki jaka lyngba ka BharatNet Phase-1 ha kylleng ki jaka jong ka jylla.){kind=link}