Shillong, Naitung 04 : Ka Border Security Force (BSF) ha ka sngi Palei, kala pyntip ba kala dep iakren bad ki shipai Border Guards Bangladesh (BGB) ba kan tehlakam lang halor ka jingjur ka jingkhaii shini tuh sha Bangladesh.
Ka jingkhaii tuh ia ka shini na India sha Bangladesh kala jur bha khamtam lyngba ka Jylla Meghalaya bad kat kum ka jingiathuh ki Heh BSF, ki shipai BSF kila ioh ban kurup haduh 21,51,498 kilo ka shini tang hapdeng u Kyllalyngkot haduh ka 30 tarik Jylliew, 2024 na khappud Meghalaya.
Ia kane ka kam khaii shini la iakren sani bha ha ka Border Coordination Conference ba 4 sngi jong ki BSF bad BGB, kaba kut noh hynne ka sngi Palei ha Shillong.
U Inspector General, Meghalaya frontier, Harbax Singh Dhillon ula pyntip ba ia kane ka kam la iakren ha ka kyrdan kaba hakhlieh bha bad ki shipai BSF bad BGB kila iasam jingtip ia ki jaka kiba jur bha ka jingkhaii tuh.
Ka khubor ka ong, ka Sorkar Jylla ka dei kaba nyngkong eh ka bym shym la lah ban tehlakam ia ki trok kiba iaid lyngba ia ki khyrdop check gate jong ka Jylla bad jam sha ki jaka khappud.
“Ki BSF ki dei kiba don tang ha khappud. Kumno kine ki trok ki ioh ban iaid laitluid da ki kot ki sla thok bad kiwei kiwei ha kylleng ki jaka ka Jylla. Kane ka dei ka jingkylli kaba hap ban jubab” ong ka khubor.
Ha kawei ka liang, u Singh ula ong ba ia kane ka kam la dep ruh ban iakren bad u Myntri Rangbah ka Jylla Conrad K Sangma, u Symbud Myntri Rangbah ba khmih ia ka kam Pohing Bah Prestone Tynsong, u Chief Secretary ka Jylla Bah DP Wahlang bad u Director General of Police (DGP) barim.
Ka tyllong khubor ka pyntip ruh ba ia kane ka kam la iakren ruh haduh ka kyrdan jong ka Ministry of Home Affairs (MHA) bad kala mih ka jingsngewthuh ba kum kane ka jingkhaii tuh ka dang iai bteng na ki khappud ka Meghalaya.
U IG ula ong ba ha kine ki khyndiat bnai bala leit, kala don ka jingduna ha ka jingdon ki shipai ba pahara ha khappud namar ka jingleit pahara ia ka elekshon Lok Sabha.
Mynta bala kut ka elekshon bad ba ki shipai kila don biang hala ki jong ki jaka, u Singh ula pynpaw ia ka jingkyrmen ba ka jingkhaii tuh ia ka shini kan sa nang duna. U Singh ula kular ba ki BSF kila kut jingmut ban iakhun tyngeh ia ka jingkhaii tuh ia ka shini sha Bangladesh.
Ha kajuh ka por, kane ka Conference ki BSF=BGB kila rai ban nym ailad shuh ia ka jingkhaii tuh ia u droks, ki tiar siat, ki bomb bad ka jingkhaii ia ki briew.
 ha ka sngi Palei, kala pyntip ba kala dep iakren bad ki shipai Border Guards Bangladesh (BGB) ba kan tehlakam lang halor ka jingjur ka jingkhaii shini tuh sha Bangladesh.){kind=link}