Shillong, Iaiong 28 : Ka Captain Williamson Sangma State University kala iatyngkhuh ia ka mukotduma iakajia jaka ban seng ia ka Shillong Campus da ka jingpyrshah ka North Eastern Hill University (NEHU) ban shimti ia ka Bijni Complex, Laitumkhrah.
Ia kane la pyntip da u Myntri ka Tnad Pule Puthi Rakkam A Sangma uba la iathuh ba dei kane ka mukotduma kaba la pyn slem ban pyniaid ia ki kam ki jam jong ka Shillong Campus.
U Myntri u pyntip ba ka jingthung kam da kaba thung contract kala iaid shaid shaid mynta hapoh ka Tura Capus jong ka Captain Williamson Sangma State University.
“Ka jingthungkam na ka bynta ka State University kala iaid na ka bynta hynriew bnai. Kane ka long eh ban dup ioh shna ia ka curriculum bad pyndep ia ki jingdonkam ba hakhmat eh.
Ka jingthungkam pura kan sa sdang noh shen. Ia ka Statutes jong ka State University ruh lah dep ban pynbiang nadong hadong” ong u Myntri.
Haba kren halor ka Shillong Campus, u Myntri ula ong “Ki kam jong ka Shillong Campus kila iaid hi. Ngi la tyrwa ban thung ia u Pro-Vice Chancellor hynrei ngi la mad noh ia katto katne ki jingtynjuh namar ka kam hapdeng ka NEHU bad ka Bijni Complex”.
“Nga ngeit ba ka NEHU kala leit mudui da ka mukotduma ha Iingkashari High Court haba iadei bad ka Bijni Complex bad ia kane hap ban iapynbeit shuwa” ula bynrap.
Haba kylli la ka Sorkar Jylla ka don jingthmu ban wad jaka shawei pat na ka bynta ka Shillong Campus, u Rakkam ula ong “Ai ba ngin pynbeit shuwa ia kane kaba mynta. Ngin ia ap ia ka rai jong ka Iingkashari bad ngin sa sngewthuh ia kaei kaba dei ban leh. Ka dei ka kam halor ka jinglong trai”.
U Myntri Rangbah ka Jylla Conrad K Sangma ha ka 14 tarik Kyllalyngkot 2025, ula plie paidbah ia ka Captain Williamson Sangma State University – ka University ba nyngkong eh ban long trai da ka Jylla ha Meghalaya.
 ban shimti ia ka Bijni Complex, Laitumkhrah.){kind=link}