Nongpoh, Lber 25: Ka Kur Mawphniang sa shisien pat ka la ioh ban shimti ia ka kam Longsan hapoh ka Dorbar Raid Nongbri hadien ba la pynskhem ia u Bah Toswel Mawphniang kum u Longsan hynne ka sngi Nyngkong, ha ka jingialang kaba long ha Kbet Nongbri, Ri Bhoi District.
La pynskhem ia u Bah Toswel Mawphniang kum u Pator Nongbri ne Longsan ka Dorbar Raid Nongbri, da u Paiem BS Syiem, Syiem ka Dorbar Raid Nongbri, da ka spong ka phali kat kum ka riti distur bad la aiti ruh ia ka sanad Longsan ba pura ban peit ia ka bha ka miat ki khun ki hajar kane ka Dorbar Raid kaba hap hapoh ka Mylliem Syiemship, Ri Bhoi District.
La pyndep ia ka riti dustur baroh katkum ki kyndon ka Dorbar Raid ia kaba leh hapoh ka ïing sad syiem jong ka shnong Kbet Nongbri, ha ka jingsakhilang ruh u Bah K S Lyngdoh Rangbah Shnong Nongsangu, bah G Sangot Nongpoh, Secretary Raid Nongbri, ki Bongthai Umshit, Ki Longsan mynsan jong ka dorbar raid Nongbri, ki Rangbah Shnong hapoh ka raid Nongbri, ki khun thana na Umshit lem bad kiwei kiwei…
U Pa’iem B S Syiem, Syiem ka Raid Nongbri u la ong ba ha kane ka sngi u bah Toswel Mawphniang um long shuh u khynnah hynrei u la long uba la rangbah bad u ba San ruh haka jingmut jingpyrkhat. U la pynbna ruh ba lyngba kane kapor, la pynskhem ruh ïa u kum u Longsan naka kur Mawphniang.
U la kyntu ruh, ïa u bah Toswel ba un long kum ka wait kaba la shut pyn nep ka ban prad lynti naka bynta ki paid ki raïot jong ka raid Nongbri, u la kyntu ruh ba un long barabor uba sngewrit bad u don ruh ka jingiatrei lang lem bad kiwei ki Longsan.
