Shillong, Nohprah 20: U Chief Executive Member (CEM) ka KHADC Bah Pyniaid Sing Syiem, u la pyntip baka Council kala pynskhem iaka rai jong ka Dorbar Shnong Mawsynram ban nym shah satia ia kano kano ka jinglehniam hapoh ka Krem Mawjymbuin.
U Bah Pyniaid u la pyntip ia kane haba jubab iaka Zero Hour Notice bala wanrah da u MDC ka Nongpoh Bah Balajied Ranee halor ka jingbyrngem pakhang surok ka Seng Kutumba Suraksha Parishad (KSP) lada ym shah ban lehniam ia ki paid Hindi ha krem Mawjymbuin, kaba don ha Mawsynram.
Haba pyrshah iaka jingbyrngem ka seng KSP, u Bah Pyniaid u la ong ba ka kane ka mat kwah lehniam ha krem Mawjymbuin ka dang don hapoh ka jingbishar ka Iingkashari Meghalaya High Court bad ka iingkashari ruh kala dep ban bthah iaka ophis Deputy Commissioner (DC) ban thaw daka Committee ban pynbeit ia kane ka kam.
“Ka jingbyrngem ka KSP ka long pyrshah iaka hukum ka iingkashari lane Contempt of Court bad kane la long beain namar ka jingbyrngem jong ki ka lah ban wanrah ka jingiakynnad hapdeng ki paidbah ka Meghalaya bad Assam, lada shah pakhang surok” ong u Bah Pyniaid.
U CEM u la kyntu ruh iaka Sorkar Jylla ban shim khia halor kane ka kam bad ban pynkhlain ia ki bor pahara khnang ba ki paidbah kin nym shah ktah naka jingbyrngem ka KSP.
Haba shim bynta haka Zero Hour Notice, u Nongialam ka Liangpyrshah Bah Titos W Chyne u la ong baka District Council ka dei ban thoh shaka tnat Home Ministry halor ka jingbyrngem ka Seng Hindu ban pakhang surok lada ym shah ban wan lehniam hapoh ka Krem Mawjymbuin.
Ula ong ba kane ka jingbyrngem kam dei tang ka jingshah byrngem ka Sorkar Jylla hynrei kadei ka jingbyrngem lang iaka Dorbar Shnong bad Hima ka Mawsynram, ka KHADC bad ki paidbah nong shong shnong ka Meghalaya baroh kawei.
U la ong ba KHADC kaba dei ka nongiada iaka khyndew ka shyiap ha Rilum Khasi ka dei ban shim ka jingkitkhlieh ban leh eiei halor kane ka jingbyrngem.
“Ngi dei ban pynrem jur ia kane ka jingbyrngem ka Seng Hindu. Ngi dei ban kren shai ha kane ka Seng ba kane ka krem ka don haka jaka kaba dang hap hapoh ka khyrnit ba hynriew bad kadei ka jaka bala ri bad sumar daka Dorbar Shnong Mawsynram” la ong u Bah Titos.
Haba pynpaw ba ka Ri India ka dei ka ri ba laitluid ban lehniam, u Bah Titos u la ong “Ngam pyrshah ia kano kano ka jingleh niam hynrei kane ka krem kam dei ka jaka lehniam bad kam don kano kano ka sakhi sabut ba kane ka krem kadei bala leh niam daki riewngeit Hindi daki spah smem kumba la kam kane ka Seng.”
