Shillong Naitung 06: Ka Khasi Hills Autonomous District Council (KHADC) ba synshar da ka Voice of the People Party (VPP), kala pynskhem ba ka khlem pat ‘Blacklist’ ne ‘tah dak iong’ ia ka kompani NESS Agency kaba pyntrei ia ka National Institute of Technology (NIT), ha Sohra, Saitsohpen.
Ka KHADC kala pyntip ia kane haba jubab ia ka RTI bala pan da ka seng Hynniewtrep National Youth Front (HNYF), South East Circle, Sohra haba kdew ia ka jingkren u Chief Executive Member (CEM) sha ki lad pathai khubor ha u bnai Kyllalyngkot 2026, ba pyntip ba ka Council kala ‘Blacklist’ ia kane ka kompani.
Ha ka jubab jong ka RTI, ka HNYF kala pan ia baroh ki Resolution, ki Offical Order Notification, ki Showcause Notice bad kiwei ki jingthoh ba ka KHADC kala shim rai ban ‘Blaclist’ ia kane ka kompani, hynrei ka jubab na u Licencing Officer ka pyntip ba ka Council kala ai ia ka Trade Licence hynrei ka ong ‘EM’ ia ka jing ‘blacklist’ haba kdew ba ka kam ka dang sah ha ka jingbishar ka Iingkashari.
“Ka HNYF kala ioh ia ka syrnot ‘To Whom It may Concern ’ ba la pynmih da ka KHADC ha ka 28 u Jymmang 2025 kaba pynshisha ba kala ai ia ka Trading License kaba thymmai sha ka NESS Agency na ka bynta u snem 2025-2026 bad ka License ka dang treikam haduh ka 31 tarik u Lber 2026” ong u Nongaiktien ka HNYF South East Circle Sohra.
Ula ong “Katei ka syrnot kaba la ai da ka KHADC kadei kaba i don jingma bad don jingartatien namar kam kdew shai ia kano ka project ne ia ka jaka treikam hynrei katei ka syrnot ka pynshisha ba ka Agency ka dang don ia ka License kaba dang treikam ne Valid”.
“Ka seng ka sngew ba kane ka syrnot ka lah ban long ka nongrim kaba aibor bad ka kabu ruh ia ka Agency ban applai Tender ha ki jaka treikam bapher bapher kumjuh ruh ki jaka treikam kiba pdiang ia ki aplikeshon ki lah ban shaniah ha ki Official Document kiba la pynmih da ka KHADC” ula ong.
Ka HNYF ka ngeit ba ki lad jingioh kam bad ki kam kiba lah ban trei da ki trai jylla ki dei ia kaban ai kabu nyngkong ia ki trai ri trai muluk bad ka seng kan bteng ban iada ia ka hok ka burom bad ka jingioh bynta jong ki paidbah trai ri trai muluk bad kan pyrshah ia kino kino ki kompany ne Agency kiba pyrshang ban knieh ia ki hok ki bynta kiba ki trai ri trai muluk ki dang lah ban trei.
Ka seng ka dawa na ka KHADC ba kadei ban pyni paitbah ia baroh ki Resolution, Official Order, Notification, Showcase Notice bad kiwei ki Record kiba iadei bad kane ka kam khnang ba ki paitbah kin tip ia ka jingshisha.
Ka HNYC kala pan copy ruh ia ka Offical Order ne Resolution jong ka Executive Committee ka VPP halor ka jingkren u CEM ha ki lad pathai khubor ba pyntip ba la ‘blacklist’ia ka NESS Agency, hynrei ka jubab ba ka KHADC ka ai ka ong “Ym don namar ba ka kam ka dang sah ha ka jingbishar ka Iingkashari”.
 ba synshar da ka Voice of the People Party (VPP), kala pynskhem ba ka khlem pat ‘Blacklist’ ne ‘tah dak iong’ ia ka kompani NESS Agency kaba pyntrei ia ka National Institute of Technology (NIT), ha Sohra, Saitsohpen.){kind=link}