Shillong Risaw 19: U Myntri Rangbah ka jylla u Conrad K Sangma, hynne ka sngi u la pynkup burom ia ki nongjop na ki District bapher iaka Aspire Meghalaya District Talents Events 2022 ha ka jingialang kaba la long ha Soso Tham Auditorium, Shillong.
Haba kren haka jingialang u Conrad Sangma u la ong naka bynta kano kano ka jylla ne ka ri, ki samla ki long ka bor bad ka jingtynjuh kaba khraw.
“Kam don ka daw ba watla ngi lah ban don ia ki jingeh kum ka jylla, balei ngim lah ban leh eiei ban don halor eh bad ban pynkylla iaka rukom pyrkhat ba ngim lah ban long kum ka jylla kaba hakhmat eh ne ban don haka kyrdan Top Ten hapdeng ki jylla jong ka ri bad ia kane ka kam, dei ban sdang na ki kynhun bapher naduh ki nongrep, longkmie bad ki samla” ong u Conrad.
Ula pyntip ba ka Aspire Meghalaya ka dei ka rynsan ban pyni iala ka sap ka phong, ban pdiang ialade bad ban tei ialade lyngba ka jingioh iaka jinghikai bad jingbtin lynti bad ia mynta hi, yn ym lah ban iohi ia u soh jong katei ka prokram hynrei ha ki 10 snem ban wan, ki samla kiba don hangne bad ka jingskhem jingmut ka jongki kan sa don ka jingkylla.
Ka long kaba donkam ban iatreilang namar uwei pa uwei u briew u don iala ka bynta bad ban pynthiknba ba ka sorkar kadei ban bhah tyngka ha ka rukom kaba dei ha kaban tei iaka sap ka phong jongki nongshong shnong.
U Myntri Rangbah ula ong, kane ka pyrthei kaba mynta kadei kaba dap da ki jingiakob, kumta hap ban kynmaw ba donkam ban iakob bad kiwei pat kiba kham khlain.
“Ka Reservation Policy ka don na ka bynta ka jong ngi hynrei kam mut pat ba ka rukom pyrkhat ka jong ngi kadei ban pyrkhat beit tang shaphang ka Reservation Policy hynrei kadei ban dei ka rukom pyrkhat ban don ia ka mynsiem ban ialeh ne iakhun. Iakhun kum uta uba donkam ban im, iakhun kum uta u bym don iaka jingbhah kyrpang, iakhun lada hap ban iakob bad kiwei pat kiba kham tbit ha ka pyrthei. Kadei da kane ka rukom pyrkhat kaba nga kwah ba don ha man la uwei pa uwei u samla ka jylla” ong u Conrad.
Ha kane ka sngi ki khynnah skul kila ioh ruh ban iakren bad kylli jingkylli ia u Myntri Rangbah ka jylla.
Uwei u khynnah skul ula kylli ia u Conrad ka long kumno ula lap bad u don iaka sap ban long kum u nongialam, khamta mhaka por ka jongu kum u samla kam da don than kata ka jingai jinghikai ban pyntbit ialade kum u nongialam. Halor katei ka jingkylli, u Myntri Rangbah u la ong, “Ki don ki lad ban jied iaka sap, watla kam long pat kumba la long ka Aspire. Hynrei u nonghikai uba paka tam u jong nga kadei naka jingmad bad jingshem hi nalade bad kumba long kiwei pat ki briew, nga la mad iaka jingrem bad jingjop la ka long ha ka kam shimet ne ha ka kam kaba nga don. Lyngba kitei baroh nga la sngewthuh khambha iakabor jong ka jingshaniah, ka jingburom bad ka jingtrei shitom”.
Ula ong ruh, ba ula ioh ruh iaka lad ban sngewthuh bad ban shemphang bha na u kpa jongu u Purno A Sangma uba long u Myntri Rangbah barim ka jylla bad u nongialam ka jylla.
Katba uwei pat u khynnah skul ula kylli kaei kaba ka sorkar kala leh ban pynneh pynsha iaka tem ka put tynrai khamtam haba bun kila ong, ba kala sdang ban iap noh, halor kane, u Conrad u la ong, ka sorkar kala pynlong ia ki prokram bad shim iaki sienjam ha kaba iadei bad katei ka bynta ban kyntiew ia ki kaitor bad ki nongtem iaki jingtemtynrai bad ka Tri-Hills Ensemble kaba dang shu dep pynlong kadei kawei napdeng ki sienjam jong ka sorkar jylla bad ula ong, baroh ki don iala ka bynta ban pynneh pynsah iaka kolshor bad iaka riti dustur.
Ka Aspire Meghalaya’s District Talent Events 2022 kala long haka 6 tarik u Risaw ha kaba la pynlong ia ki prokram ki bapher ha kylleng ki district jong ka jylla ha u bnai Risaw bad Naiwieng bad na ka bynta ka East Khasi Hills la pynlong hynne ka sngi ha Soso Tham Auditorium, Shillong ha kaba la wan ban iashimbynta da ki 26 ngut ki nongdon sap na ki 5 tylli ki shlem pule bad la jied pat tang ia ki 3 ngut napdeng jong kitei baroh.
Ha katei ka jingialang la pynkup burom ia ki 103 tylli ki shlem pule jongka District da u Myntri Rangbah ka jylla u Conrad K Sangma, halor ka jingiashimbynta ka jongki haka Meghalaya Youth Survey 2022 bad Soft Skills Training lyngba ka Aspire Meghalaya.
Ha katei ka jingialang la iadonlang ka Kong Rosetta M Kurbah, Director, School Education & Literacy, ka Kong Isawanda Laloo kaba long ka Deputy Commissioner jongka East Khasi Hills District, u Bah Paia B War Nongbri, Assistant Director, Sports & Youth Affairs bad kiwei kiwei.
