Shillong, April 27, 2023: Ka tnad Pule Puthi ka jylla ryngkat ka National Law University, Meghalaya hynne ka sngi Palei, kala pynlong iaka Outreach Programme (ka prokram ban iarap, kyntiew bad kyrshan) ia ki Principal, Nonghikai bad ki samla pule na ki Higher Secondary School kiba na East Khasi Hill bad ki jaka kiba marjan ha Yojana Bhavan, Main Secretariat.
Ia katei ka prokram la plie da u Chief Justice ka Meghalaya high Court Justice Sanjib Banerjee ha ryngkat ka jingdonlang jong ki nongbishar kiba kynthup ia u Justice H.S Thangkhiew bad Justice W Diengdoh.
Haba ai jingkren, u Chief Justice Sanjib Banerjee ula pyntip ba ka National Law University (NLU) kan sdang iaka jingai jinghikai naduh u Naitung mynta u snem bad ka jingkhot aplikeshon “Online” ia ki samla pule kala sdang naduh ka 21 tarik mynta u bnai bad kan kut haduh ka 21 tarik u Jymmang bad iaka Admission Test yn pynlong haka 28 tarik u Jymmang katba iaka resol yn pynbna haka 9 tarik u jylliew bad ia ki klas yn sdang naduh ka 10 tarik u Naitung 2023.
U Justice Banerjee ula pyntip ba na ka bynta ka Undergraduate Courses yn pynrung haduh 60 ngut ki samla pule kaba kynthup mar 20 na ka BA LLB, BBA LLB bad BS LLB Honours bad kan don ruh 10 ngut na ka bynta ki samla kiba pule haka post-graduate.
Ula iathuh baka jingsiew jong ki samla kiba pule haka undergraduate bad postgraduate ka long kaba rit bha haba ianujor bad ka jingshim kaba shim da ki college shimet, ki university ne kiwei pat ki national university.
U Chief Justice ula ong, namar ba ka University ka dang long kaba thymmai bad kum shibynta ban ialeh ha ka ban khring ia ki samla kiba kwah ban long ki nongiasaid ain, kumta yn pynlong shuh shuh ia kum katei ka prokram ha kylleng ki bynta jong ka jylla.
Ha katei ka jingialang la iadonlang u Commissioner & Secretary ka tnad pule puthi u Pravin Bakshi, u Secretary, Law & Legal Remembrancer & Parliamentary Affairs u Bah CVD Diengdoh bad kiwei kiwei.
