Shillong, Risaw 17: Ka tnat ri Dohkha ka sorkar jylla mynta ka sngi kala pynlong iaka tamasa Dohkha lane ka 7th Aqua Fest 2023 ha phyllaw jong ka State Central Library.
Ia kane ka tamasa Dohkha la pynlong naka bynta ban pynsngewthuh paidbah iaki lad jingmyntoi ka ba mih naka kam ri Dohkha kiba la wan lyngba ki skhim sorkar jylla bad sorkar pdeng.
Ha kane ka sngi la iohi ruh ki jingpyninam iaki jait Dohkha na kylleng sawdong ka jylla kiba ki paidbah kila ri lyngba ka jingiarap ka tnat ri Dohkha.
Ki nongri Dohkha kila pynpaw ka jingai khublei iaka tnat ri Dohkha ka sorkar jylla lyngba ka project Blue Revolution.
Haba kren ha kane ka sngi u Myntri ka tnat kam ri Dohkha u bah A.L Hek ula ong ba kane ka long ka sngi kaba kmen namar u kynmaw iaka ing ka sem lajong ka ba la im jakpoh daka die Dohkha ha Shillong.
U bah Hek ula ong ba ka kam ri Dohkha ka long kaba kyrkhu bha namar kane ka kam ym tang ba ka kyntiew iaka ioh ka kot ha ing ha sem hynrei ka aikam ruh ia kiwei ki paidbah ha ka ban ri ne die Dohkha.
Ula ong ba ka tnat ka don jingthmu ban nang pynheh bad nang pynbun shuh shuh iaka kam ri Dohkha ban nang plie ka lad ioh kam ioh kam iaki paidbah ka jylla.
“Nalor ka Blue Revolution, ka sorkar jylla lyngba ka Meghalaya Mission Scheme ka tnat kan iarap pisa iaki paidbah ban sengkam lajong haka kam ri Dohkha ban pynlah iaka jylla ban pynmih khambun iaki Dohkha naka bynta ban pyndap pynbiang iaka jingdonkam” la ong u bah Hek.
U bah Hek ula kyntu ia baroh ban iatreilang ban nang kyntiew shuh shuh iaka kam ri Dohkha naka bynta ban kyntiew iaka ioh ka kot jong ka jylla.
