Mairang, Iaiong 13: Kum shibynta ban kyntiew ia ki nongseng kam la jong bad ki riew don sap ka jylla bad ban ai ha ki ia ka rynsan iatei bad phylliew jingmut, ka ophis jong u General Manager, District Commerce & Industries Centre, West Khasi Hills District Nongstoin, ka la pynlong ia ka District Level Industrial Exhibition kaba ar sngi hapoh Tirot Sing Memorial Hall, Pyndengumiong ia kaba la leit ban plie da I kongsan Kong V.A Hynniewta I ba long I Additional Deputy Commissioner ka Eastern West Khasi Hills District, Mairang ha ka sngi plaei.
Kiwei pat kiba la iadonlang ki long u General Manager ka District Commerce & Industries Centre, West Khasi Hills District, Nongstoin, u Bah B.F Sun, kiwei de ki ophisar na ki tnat treikam bapher bapher jong ka sorkar, ki nongialam shnong bad ki nongseng kam lajong na East Khasi Hills, West Khasi Hills bad Eastern West Khasi Hills District.
Ha ka jingkren kum I Kongsan, I Kong V.A Hynniewta, i la ai khublei ia ka District Commerce & Industries Centre, West Khasi Hills District, Nongstoin na ka bynta ka jingpynlong ia kane ka Exhibition kaba nyngkong eh hapoh Eastern West Khasi Hills District, kaba pynioh rynsan ia ki nongseng kam lajong bad ki riew don sap ka thain ban pyni ia la ki sap ki talen ki jong ki.
I la kyntu ruh ia ki paidbah ba kim dei ban khmih lynti than tang ia ka kam sorkar, hynrei ban wad lad wad lynti da kumwei pat ban ieng ha la ki kjat da kaba ba seng ia ki kam lajong.
Lah ban kdew hangne ba ka jingthmu jong kane ka Exhibition kaba ar sngi, ka long ban ai lad ia ki nongseng kam lajong ban pyni ia la ka sap ka phong, lyngba ka kam kaba ki trei bad ban ai mynsiem ruh ia kiwei pat ki nongshong shnong, ba kin kyntiew ia la ka ioh ka kot lyngba ka kam lajong, da kaba shim kabu ia ki lad jingkyrshan jong ka sorkar lyngba ka tnat Commerce & Industries.
Ha kane ka exhibition kaba ar sngi, lah ban sakhi ia ka jingdon jong ki dukan bapher bapher kiba kynthup ia ki dukan die jingbam, ki dukan kiba die ia ki jingshna bad jingbuh jingsat ba la oh shrong na ki dieng bad siej, ki dukan die jain bad kiwei kiwei de ia kiba la buh da ki nongseng kam lajong bad ki tnat sorkar kumjuh.
