Shillong, K’lyngkot 12 : U Myntri ka tnad Pule Puthi Rakkam A Sangma ha ka sngi Thohdieng, ula ong ba ka result thungkam ia ki Assistant Teacher ha ki skul Lower Primary ka Sorkar hapoh Dadenggre Sub Division, West Garo Hills ka dei kaba la pynshong nongrim kat kum ka jingpass bha (merit).
Haba iakren bad ki nongthoh khubor, u Rakkam ula ong “Ia ka result la dep ban pynbna bad la pynshong nongrim kat kum ka jingpass bha bad namar kata, ngi la thung ia ka kynhun shim interview . Ia kine ki kyrtong la pynbna haba pyn shong nongrim kat kum ka jinglehbha jong ki ha ka interview. Namar ka bor ka shong ha ka kynhun shim interview ban ai marks kat kum ka jingleh bha jong ki”.
“Namar kata, kane ka result bala dep pynbna ka dei kaba la pynshong nongrim kat kum ka jinglah leh bha jong ki kyrtong da ka kynhun shim interview bad ngam don eiei ban kynthoh ia kane” ula bynrap.
Halor ka jingkylli, u Rakkam ula ong ba ka jingkylli halor ki riewlum bad ki bar jylla kam mih satia namar kine ki kam ki hap hapoh ka Open Category lane unreserved category kat kum ka Job Reservation Policy ka Jylla.
“Ka dei ka unreserved category. Ka jingkylli ia ki riewlum ne bar jylla kam mih satia namar la pynshong nongrim kat kum ka jingleh bha jong ki nongiakhun ia ka kam da ka kynhun shim interview” ula ong.
Ha ka sngi Palei, ka Akhil Bharatiya Vidyarthi Parishad (ABVP) Meghalaya kala dawa ia ka Sorkar ban pynsangeh ia ka result jong ka jingthungkam Assistant teacher ha ki skul Lower Primary ka Sorkar hapoh Dadenggre SubDivision, West Garo ban plie lynti ia ka jingtohkit halor ki jingkynnoh ba don shibun ki jingbym biang.
