Shillong, Risaw 06 : U Myntri ka Koit ka Khiah Bah Wailadmiki Shylla, ha ka sngi Nyngkong, ula pynshai ba ka jingai ia ka bhah pule MBBS na ka bhah pule ka Jylla, ka dei kaba la leh kat kum ka Standard Operating Procedure (SOP).
Haba jubab ia ka jingkynnoh ba leh bym hok, u Bah Wailad haba iakren bad ki nongthoh khubor ula ong watla ki don katto katne ki jingsngewkhia bala pynsngew da ki Sengbhalang kynthup ka KSU bad JSU, hynrei kaba bun hi na kane ka kam ka dei kaba la lah ban pynbeit.
U Myntri ula batai ba kat kum ka SOP, ki samla pule ba ioh bun marks eh (top score) na ka thup jong ki Khasi-Jaintia ki lah jied ban iai neh hapoh ka bhah bala buh kyrpang (reserve category) watla ki lah ban jied ia ka bhah ba khlem buh kyrpang (unreserved) Hynrei, hadien ba pynsngew ia ki jingsngewkhia da ki Sengbhalang, kine ki samla pule kila pynpaw ia ka jingkloi ban shim noh ia ka bhah ka ba khlem buh kyrpang.
Hadien ka jingialang, la shim ia ka rai ba yn pyntreikam ia ka jingkyrpad ki samla pule.
.
“Ka samla pule kaba dei ka topper na ka reserved category ki Khasi Jaintia, ka dei ha ka jingshisha ban leit noh sha ka thup unreserved category namar ka marks jong ka, ka kham heh ban ia kiwei ki kyrtong. Hynrei ha ka SOP, ka kren shai ba ka shong ha ka kyrtong ban jied. Namar b aka lah ban jied ia baroh artylli-unreserved bad reserved category, ka shong ha ka ban jied. Haba nyngkong, kala pynpaw ba kan jied beit ia ka bhah ki Khasi-Jaintia, ta ka daw ngi la pyllait ia ka thup. Hadien haba ki sngewbhalang kila pynpaw ia ka jingsngewkhia, ka ruh kala phone bad kala pynpaw ba ka kloi ban leit noh sha ka unreserved category” ula ong.
(Namar kata), mynta ka sngi ngi la khot ia ka jingialang bad baroh ki don ia ka jingsngew, naba kane ka samla kala mynjur, kumta na ka Tnad ruh kam don jingeh shuh. Nga tharai ba mynta lah dep pynbeit lut ia kiei kiei baroh” ong u Bah Wailad.
Haba iadei bad ka jingseng ia ki medical college ba thymmai, u Myntri ula pynpaw ia ka jingkwah jong ka Sorkar ban seng ia ka medical college ha Jowai, Nongstoin bad kiwei pat ki bynta jong ka Jylla. Hynrei, ula ban jur ba ka jinglah ban pyntrei kam bad ka jingbiang ka pla tyngka kan long kaba kongsan ha ka ban pynthikna la kine ki project ki long ne em ban pyntrei.
Halor ka jinglong jingman ki artylli ki medical college, u Bah Wailad ula ong ba ka jingiasyllok ka dang iaid ban pynrung klas ia ki samla pule ha Shillong Medical College katba ka jingtei jong ka Tura Medical College ka dang sahteng ban pyndep.
.){kind=link}