Shillong, Iaiong 05: U Myntri ka tnad Bording u AT Mondal ula ong, ka sorkar ha ka jingbym banse kala pyntreikam iaka jingpynlip ia ka bording elektrik namar ka jingduna um jong ki wah haka jylla.
“Ka long kaba shisha ba ki paidbah kila mad iaka jingeh na ka jingpynlip iaka bording elektrik ne Load Shedding bad wat ki khynnah pule kiba ialeh eksam ruh kila shem jingeh bad ngi don ka jingsngewkhia halor kane. Hynrei ha kum kane ka aiom, kiba bun hi ki jaka pynmih bording kim lah ban pynmih bording namar ka jingduna jong ka um ha ki wah kiba shaniah ha u slap ban shlei” ong u AT Mondal.
Ula ong, nalor katei ka jingeh, sa kawei pat ka jingeh kaba la mih ka dei ba wat na ki projek jong ka sorkar pdeng ruh kim shym la lah ban pynbiang iaka bhah bording elektrik kaba ka jylla kadei ban ioh bad ka jingkhang ia kitei ki projek ka jylla ka la duh bun bha iaka bhah bording.
U Mondal ula ong haka por lyiur haba ka jylla ka pynmih bun iaka bording ka ju ai kylliang iaka bording sha ki jylla ne sha kino kino ki kynhun bad haba ka jylla ka mad iaka jingduna ban pynmih bording ka ju shim biang ia kane ka bording na kitei kiba kala ai kylliang, hynrei mynta haba kiwei pat ki jaka kila sdang ban shit, kim treh ban ai iaka bording namar ba ka jur palat ka jingdawa iaka bording elektrik, hynrei ka Meghalaya Electricity Corporation Limited (MeECL) bad ka Sorkar ki dang trei shitom ban ialeh ban weng ia ka jingeh jong ki paidbah.
“Ka jingpyntreikam iaka jingpynlip bording da bun kynta kam dei satia ka jingleh khnang hynrei la leh ia katei da ka jingbym banse namar ka jingpynmih duna palat iaka bording elektrik” ong u AT Mondal.
Ula ong, shisien ba ka jinglong jingman kala bha biang, ka sorkar kan sa pynjynsur noh iaki kynta jong ka jingpynlip iaka bording elektrik ha ka jylla.
“Ia mynta hi ngi dang lah ban pynmih tang 88 Million Unit hynrei ka jingdonkam ka long haduh 200 Million Unit bad ka jingduna jong ka jingpynmih iaka bording ka long haduh 112 Million Unit” ong u Myntri haba pynpaw iaka jingbynniaw ba ka jylla kala mad iaka jingeh.
Ula iathuh ba ka sorkar kala dep shim ia ki rai ban pynmih bun iaka bording bad kala iasoi iaka Memorandum of Understanding (MoU) bad ki kompani shimet kiba pynmih bording hynrei kam shym la lah pat ban urlong namar kito kiba don jingmut ban sdang noh ia ka kam, kim shym la sdang satia namar ka jingiakynduh ia ki jingeh bad ka sorkar ka dang khmih ia kine ki bynta khnang ba ka kam kan ioh ban iaid noh shakhmat.
Haba kylli sa katno ka MeECL ka dang shah ram ban siew pyndep, u AT Mondal ula ong ba um don satia iaka jingkhein kaba paka namar ba katei ka jingsiew kadei kaba la siew man la ka por bad ula pynthikna ba ka sorkar ka dang kyrshan iaka MeECL kumta ym dei ban khuslai eiei halor kane ka bynta.
Pule lang ia kane: Kem ka ANTF ia u Nongkhaii droks, kurup heroin ba shongdor T.1.4 klur
