Shillong, Lber 17: U Myntri Kam pohiing ka jylla u Bah Prestone ula pynshai ba ka sorkar Assam kam shim la wan kyntur pud ha ki jaka jong ka Hima Sohiong ha Nongwah-Mawtamur kumba la kynnoh da ka Joint Action Committee (JAC) hynrei ka jingshna ia ka surok ka dei eh na ka bynta ban pyniasoh iaka Assam bad Meghalaya.
“Ka JAC kala kynnoh ba ka Assam kala wan kyntur pud ha ki jaka jong ka Hima Sohiong, hynrei haba u Deputy Commissioner ula kylli na ki bor pyniaid shnong, la shem ba kam shym la don kano kano ka jingkyntur pud hynrei kadei tang ka jingshna iaka surok PMGSY kaba pyniasoh iaka jylla Assam bad Meghalaya ka ban ai jingmyntoi hi ia ki paidbah” ong u Bah Prestone Tynsong.
U Myntri Kam Pohing ula ong, kum katei ka jingshna surok kala jia teng ha ka shnong Balakhawa bad ka jingpyntrei iaka surok kadei da ka jingiasngewthuh jingmut lang hapdeng ki shnong kiba hap ha ka jylla Assam bad Meghalaya na ka bynta ka bha ka miat jong ki paidbah.
“Kum kine ki jingpynsngewthuh bakla kin ialam bakla ia ki paidbah ki jong ngi bad nga kyrpad ia ki dkhot ka JAC bad na ka liang jong u Syiem ba kin ym pynmih ia kano kano ka kynrum kyn ram namar ba mynta ka jingkren pynbeit pud ha ka wat ka baar kan sa sdang noh” ula ong
“Kam dei ban mih kano kano ka jingpynsngewthuh bakla, namar ka jingshna iaka surok kan ym ai jingmyntoi tang ia ka Assam hynrei wat iaki nongshong shnong ka Meghalaya ruh. Da ka jingshna ia ka surok kam mut ba ka Assam kala wan kyntur pud” ula bynrap.
U Bah Prestone ula ong “Kam don kano kano ka kot ka sla kaban ong ba da ka jingshna surok, ka jaka ka puta kan hap noh sha Assam ne lada ka Meghalaya kan leit shna surok ha Assam ki jaka kin hap noh sha Meghalaya”.
Ula ong, ba ula dep ruh ban bthah ban pynkhlain da kaba buh bun ngut noh ia ki pulit ha ki Border Outpost kiba don ha kylleng ki thaiñ khappud bad ka jylla Assam khnang ba ki paidbah kin ioh iaka jingshngain bad jingiada.
