Shillong Jymmang 20: U Myntri Rangbah ka jylla u Conrad K. Sangma hynne ka sngi Baar, ula kren da kaba shai kdar ba ka jylla Meghalaya kan pynlong marwei ia ka lympung iakob ialehkai jong ka National Games 2027, ha kaba ia ki jingiakob ialehkai ki bapher bapher kaba kynthup ia ka jingplie pyrda bad ia ka jingpynhap pyrda ia kane ka lympung yn pynlong ha ka jylla Meghalaya.
“Kin ym don pat kiwei ki jylla kiban pynlong lang ia kane ka lympung ialehkai ne Games. Ka Meghalaya kan dei ka jylla kaban pynlong ia kane ka jingiakob ialehkai bad kane ka long kaba shai kdar” ong u Conrad Sangma haba pynshai ia ka jingpynsaphriang khubor bakla sha ki paidbah, hadien ba u Myntri ka tnad Ialehkai ula dep ban ai jingkren halor kane ka bynta.
Kane ka jingpynshai kala mih, kadei hadien ba la mih ki jingpynbna kiba ai jingmut ba wat kiwei ki jylla jong ka thain shatei lam mihngi ruh kin don bynta ha kaban pynlong ia kane ka lympung iakob ialehkai. U Conrad ula batai ba watla ia ka jinglong kyrpang kadei kaba la kyntiew da ka Indian Olympic Association (IOA) bad ka Sorkar India, hynrei ka jylla Meghalaya kan dei ka jylla kaban shim ia ka jingkitkhlieh ban pynlong ia kane ka lympung iakob ialehkai.
“Ba kyntiew ia ka jingioh bynta lang, ia kawei ne ar tylli ki jingialehkai lah ban ai sha kiwei pat ki jylla jong ka thain shatei lam mihngi. Kane ka long tang ban phah ia ka khubor kaba bha ia ka jingdon ia ka jingiatylli jong ka thain” ong u Conrad Sangma bad ka bynrap, “Hynrei na ka bynta ki 25 tylli tam ki jingialehkai yn pynlong hapoh ka jylla Meghalaya bad ia ka jingplie pyrda bad jingpynkut ia kane ka lympung ialehkai ruh yn pynlong hi hangne”.
Ula pynpaw ruh ba ia kane ka lympung iakob ialehkai kam dei satia ba ka Meghalaya kan ia pynlong lang bad kano kano ka jylla, hynrei kan dei beit kaban pynlong pura hapoh ka jingialam ka Meghalaya hynrei kan don pat kum ka dak jong ka jingiashimbynta lang jong ki jylla kiba don marjan.
“Kane kan dei pura ka prokram kaban pynlong da ka Meghalaya. Kam don kano kano ka jingartatien ne ka jingkylli ba kan dei satia ka lympung kaban ia pynlong lang bad kiwei pat ki jylla” ula ong.
Lah ban kdew, ba u Myntri Rangbah ula pynbna ruh ba ka jingpynlong ia kane ka National Games 2027 kan dei kaba yn ym pyndonkam satia ia ki plastik.
La khmih lynti ba da ki hajar ngut ki nongialehkai bad ki nongpyniaid kin wan sha Meghalaya ban iashimbynta ha ka National Games, kumta ka lad ban pyndonkam ia ka plastik kan long kaba jur bha. Naduh ki bilor um, ki jingthep ia ki jingbam, ki jaka thep ia ki marbam, ki ID bad kiwei kiwei bad wat ki jain ki nep bad ia ki tiar ki tar kiban pyndonkam kidei kiba don ia ki plastic, kumta ka jingpynmih ia ki niut ki nier ruh kan long kaba bun bah.
