Shillong, K’lyngkot 11 : U Myntri Rangbah ka Jylla Conrad K Sangma hynne ka sngi Balang, ula pynshai ia ka jingkynnoh ba plie ia ka Ganol Hydro Project khlem pat lah pyndep pura da kaba ong “Nga la pynbna da kaba shai ha ka jingplie paidbah ia kane ka project ba ngi dang pyndep tang shi unit”.
“Ngi la pynpaw ruh ba sa artylli ki Unit yn sap lie paidbah shen bad namar kata, ha katei ka sngi ngi haba ngi plie, ngi la plie shuwa tang ia kawei ka Unit. Lada ki ong ba ki ar unit kim pat treikam mynta, ngi lah dep batai lypa naduh kaba sdang” ula ong.
U Myntri Rangbah ula ong ba ka project kala treikam mynta bad kawei ka Unit kala lah ban pynmih bording katba ki artylli kiwei pat ki Unit kin sa sdang treikam noh haduh 15-30 sngi naduh mynta ka sngi.
“Katba ka jingpyntrei ia ka project ka dang iaid shakhmat bad iohi ia ka jingiaid beit ka rukom treikam kaba rim, kin sa pyntreikam noh ia kiwei ki unit ruh” ula ong.
U Conrad ula ong ba Unit ba nyngkong kala lah ban pynmih bording hynrei ym pat shym la thep ia ka ha ka grid namar donkam ban leh ia shibun ki test ban pynthikna ba kan ym don jingthut ha ka jingiaid ka bording.
Lah ban kdew hangne ba ha ka 4 tarik Kyllalyngkot, u Myntri Rangbah ka Jylla ula plie ia ka Unit ba pynmih bording 7.5 MW na ka project ba 22.5 MW jong ka Ganol Hydro Power Project,West Garo Hills, kaba la shu iehteng naduh u snem 2014.
