Shillong, Rymphang 26: U MLA ka UDP Bah Paul Lyngdoh ha ka sngi Balang, ula pynshai ia ka rai jongu ban iashimbynta ha ka jingiatai ha ka Cut Motion bad ban jur ba ki jingkylli ba ula wanrah ki dei kiba thmu ban pynkhlain ia ka tnad treikam ym ban tynrah shimet (target) ia uno uno u Myntri.
“Nga kwah ban pynshai, balei nga iashimbynta ha ka cut motion. La kylli ia nga da ki paralok na ki lad pathai khubor kiba sngew ba nga la khyrwait shimet ia u Myntri uba khmih ia ka tnad Bording” ong u Bah Lyngdoh ha ka iingdorbar.
Ula batai ba man la ka por ula kylli jingkylli ia u Myntri Rangbah bad ia u Myntri ka PHE bad ula pynkhreh ruh ia ki jingkylli bynrap ban kylli ia u Symbud Myntri Rangbah ka jylla uba khmih ia ka Urban Affairs hynrei um shim la ioh lad shuh ban kylli namar uba wanrah ia ka jingkylli, um shim la poi sha ka dordar.
“La kylli ruh ia nga da uwei u nongpathai khubor hynnin ka sngi, ba ngam shim la kylli eiei ia kum kitei ki jingkylli ha ka por ba u AT Mondal ula long u Myntri ka tnad Bording. Nga lah ai ka jingbatai ba kum u paralok uba donlang ha ka kynhun Myntri, ngim lah ban kylli jingkylli hapoh ka iingdorbar thawain ka jylla, hynrei shabar jong ka dorbar nga la kylli bun ki jingkylli” ula ong.
U Bah Lyngdoh ula banjur ba ka jingthmu jongu ka long ia ka tnad treikam ym ia u briew shimet.
“Nga ngeit skhem ba ngi don hangne ban pynkhlain ia ki tnad treikam. Ngi don hangne ha ka temple, ka ïingmane jong ka synshar paitbah bad ngi bud pyrkhing kum ki dkhot jong ka iingmane” ula ong.
U Bah Paul ula ong ruh “Ki rangbah ki lah ban wan ki rangbah ki lah ban leit, hynrei ka jaka treikam ka neh beit. Ngi don hangne ym shi rta kum ki dkhot jong kane ka iingdorbar ne kum ki dkhot jong ka kynhun myntri hynrei ka jaka treikam bad ka rukom treikam kan iaid bteng”.
