Shillong, Nohprah 13: Ka Sorkar Jylla ha ka sngi Thohdieng, kala pynpaw ba ka jingthmu ban pynkylla ia ka kyndon jongka Meghalaya State Investment Promotion & Facilitation Act (MSIPF), 2024, ka dei tang ban shah ia ka Invest Meghalaya Authority (IMA) ba kan thied jaka lypa ne Land Bank ka ban dei thik na ka bynta ki kam pynroi jong ki karkhana. Ka jingkylli ban thied hi ia ka jaka da kino kino ki nongkynshew kam, kan ym mih satia.
Kane ka jingpynshai kala mih hadien ba kala don ka jingpyrshah na ki ba bun balang halor ka jingrai ka sorkar jylla ban pynkylla ia ka MSIPF, 2024.
Katkum ka kyrwoh na u Joint Secretary incharge Planning Investment Promotion and Sustainable Development Department, ula ong ba ia ka Meghalaya State Investment Promotion & Facilitation Act (MSIPF), 2024 (Notification No. LL(B) 10/2024/61 dt. 14.03.2024) la pynlong ain ban “pynsuk ia ka jingwan sengkam sengjam” ha Meghalaya kaban kyntiew ia ka roi ka par bad ban thaw ia ka lad ban aikam aijam ia ki samla ka jylla.
La ong, ba la thaw ia ka Invest Meghalaya Authority (IMA) kum ka Single Nodal Authority na ka bynta ban kyntiew ia ka jingsengkam bad ban iarap pynsted ia ki kam ki jam kumba la leh da kiwei pat ki jylla ha ka thain Shatei Lam Mihngi, kat kum ka jingai jingmut da ka Ministry of Development of North-Eastern Region (MDONER). Kane ka jingthmu kadei ruh kaba iaid katkum ka MSIPF Act, 2024, ia kaba la pdiang bad mynjur da ka ïingdorbar thawaiñ ka jylla ha u Lber 2024.
“Ka jingpynkylla dang shen ia ka Meghalaya State Investment Promotion & Facilitation Act (MSIPF), 2024, ka ailad ia ka Invest Meghalaya Authority (IMA) ban thied lypa ia ki jaka na ka bynta ki kam pynroi karkhana. Ka jingthied lypa ia ki jaka ka dei ka kam pynroi kaba iaid bad shimkhia da ki kynhun bapher bapher ha ka jylla kum ka Meghalaya Industrial Development Corporation (MIDC), Meghalaya Transport Development Corporation (MTDC) bad ka New Shillong Township Development Agency (NSTDA),” la pynpaw ha ka kyrwoh.
Kala pynpaw shuh shuh “Ka jingkylli kam mih satia halor ka jingioh thied beit beit da ki nongkynshew kam. Wat ban seng ia ki karkhana, yn ai jaka kat kum ki kyndon jong ka Meghalaya Transfer of Land (Regulation) Act, 1971.”
“Ka Meghalaya Industrial & Investment Promotion Policy (MIIPP), 2024, kala don ia ki kyndon kiba kyrpang ban ai ia ki lad ban aikam aijam ha ki karkhana kiba la seng thymmai. Ka Clause 3.1.11 jongka MIIPP Policy, 2024 ka donkam ia ki karkhana ban thungkam 90% ia ki trai shnong ka jylla ha ka kyrdan Non-Managerial ne ka bym don bynta ha ki kam pyniaid & 50% ia ki trai shnong ka jylla ha ki Managerial Positions ne ki kyrdan ha ka kam pyniaid,” la pynkut ka kyrwoh.
, 2024, ka dei tang ban shah ia ka Invest Meghalaya Authority (IMA) ba kan thied jaka lypa ne Land Bank ka ban dei thik na ka bynta ki kam pynroi jong ki karkhana.){kind=link}