Shillong Lber 18: U Rangbah Shnong ka Mawthlong Mynsain Bah Starwell Mawlong, hynne ka sngi Nyngkong, ula pynshai ba ki nongialam shnong kim don bynta eiei ha ka jingbom shnong ia ki arngut kiba la shah kynnoh menshohnoh ha ka sngi Saitjaiñ bad ong ba ki paidbhur kim shym la ailad satia ia ki nongialam shnong ban tuklar ha katei ka jingjia.
Haba batai shaphang ka jingsdang jong katei ka jingjia, u Bah Starwell ula iathuh “Ha katei ka sngi, ki paidbah kila kem ia kine ki arngut ha ka step phyrngap bad kala mih ka jingkynnoh ba ki dei ki menshohnoh. Ia kine ki arngut la kem na ka jaka kaba don ha khappud ka Mawthlong bad ka Nongbsap”.
“Nga la ioh jingtip ia ka jingjia ha ka por 3 duna mynstep bad ynda nga la poi ha katei ka jaka ryngkat ki nongialam Shnong, ki paidbhur kila bun ki dei n aka shnong ba marjan, kila bom la shoh ia kine ki arngut” ula bynrap.
U Bah Starwell u iathuh ba ki Nongialam Shnong kila knieh noh ia kitei ki arngut na ka kti u paidbhur ban ialam sha Iingshnong khnang ban tohkit ban lap ia ka jingshisha hynrei ynda poi ha ka madan shnong, ki paidbhur kila knieh biang ia kine ki arngut bad kila shoh la bom biang ia ki. U ong ba dei hadien katto katne por, ba ki nongialam shnong kila ioh ban rah ia kitei ki briew sha ka Iingdorbar Shnong.
U Bah Starwell u iathuh ba ka jingkynnoh kala mih ba kine ki arngut ila leit prong ha kawei ka Iing bad kila ksih na ryndang ia kawei ka longkmie ryngkat ka jingset da ka kti ia ka shyntur. U iathuh ba kane ka Longkmie kala ioh dait ia ka kti bad kala ioh ban jylla briew ban pan jingiarap.
Kat um ka jingong jong u, la pyntip ba ki don 3 ngut ki briew kiba leit prong ha kane ka iing jong kane ka longkmie kaba don 5 ngut ki khun hynrei ha ka por ba ka ioh hylla briew, uwei na kine ki briew ula phet noh bad ki para marjan kila ioh ban bat satang ia ki arngut.
U iathuh ba ki bor Shnong kila pyrshang katba lah ban rah ia kitei ki arngut sha Iingdorbar Shnong ban tohkit khnang ban lap ia ka jingshisha bad ban suk ruh lada aiti sha ka bor jong ka ain. U ong ka Shnong ka kwah tip ia ki daw halor ka jingwan rung jong ki hapoh ka shnong, ban tip ki dei kiba kumno la ki dei ki nongtuh, nonglute ne kiei kiei ruh.
“Hynrei ngim shym la iohlad satia ban tohkit namar ka jingbym ailad u paidbah kiba la iamih ym tang na Shnong hynrei na ki shnong ba marjan ruh kumjuh” ula ong.
“Kum u Nongialam Shnong nga la pyrshang ruh ban pyntip mar mar sha ki bor ka Ain halor kane ka jingjia khnang ba ki Pulit kin wan shimti ia kine ki briew shuwa ban poi sha ka jingjia ba sngewsih hynrei ki paidbhur kila knieh ia ka mobile jong nga bad ngam shym la iohlad shuh. Hadien kane, ngam tip shuh mano ba pyntip sha ki Pulit” ula bynrap.
U Bah Starwell u iathuh ba ynda wan poi ki Pulit, ki paidbhur kila nang khluit bad kila behkrad ia ki Pulit ban tur sha Iing Dorbar ka Shnong. U ong ba ki don ki paidbhur kiba la kyrdem bad pynpait ruh ia ka jingkhang jong ka Iingdorbar bad hadien kila sei biang ia kine ki arngut ban bom ban tied shnong.
Hynrei da ka jingwan poi ki SOT na Shillong, ki Pulit kila lah ban tehlakam ia u paidbah bad kila ioh ban wan ialam noh ia u sha Sohiong CHC ban ai jingsumar bad hadien la pynkynriah sha Civil Hospital Shillong.
U Bah Starwell ula pynshai ba na ka liang ka Dorbar Shnong kam don bynta eiei ban kynnoh ba kitei ki arngut ki dei ki menshohnoh namar kam shym la iohlad ban kylli ne bishar ia kitei ki arngut.
