Imphal, Iaiong 28 :U Myntri Rangbah (CM) ka Manipur u N Biren Singh u la pynsangeh noh ia ka jingleit jurip sha Churachandpur district hapdeng ki jingmih khubor jong ka jingiakynad ha ki katto katne ki jaka.
Katkum ki khubor la ong ba na ka liang ki bor pulit ka Manipur ki la hap ban pyndonkam da ki lyer pynsat khmat ban pynpra ia ki paidbah kiba la ialum lang shabar ka khyrdop jong ka PT Sports Complex.
Haba pynpaw halor ka jingjia kaba la jia hynnin ka sngi Palei ha kaba ka la don ka jingthang dusmon ia ka jaka kilan met (gym) kaba u dei ban wan plie, na ka liang u CM N Biren Singh u la ong ba ia kane ka kam bymman la leh da ki kynhun runar kata ka jingjia kaba ki runar ki ju leh sha kylleng ki jaka.
Hynrei, watla katta u la ong ba na ka liang ka sorkar BJP kan ym lah ban shah ia kiba kum kine ki kam ialeh pyrshah ri, bad shen yn shim ka jingpynshitom pyrshah ia kiba donkti ha kiba kum kine ki kam bymman.
Nalor kata u la kam ruh ba katei ka jingjia kam shym long pyrshah ia ka sorkar hynrei ka dei ka kam pohiing hapoh ka constituency.
Katei ka prokram ka dei na ka bynta ka jingrakhe ia ka lyngkhuh snem kaba nyngkong jong u MLA kas 58-Churachandpur ia kaba une u MLA hi ula khot sngewbha ia u.
Shibynta jong kane ka prokram, ki la kyrpad na ka bynta ban wan plie ia ka jaka kilan met hapoh PT Sports Complex, ha New Lamka kaba hap hap Churachandpur district. Hynrei, ka long kaba sniewbok, ki katto katne ki runar ki la pynjulor noh ia kane ka jaka.
Na ka liang u MLA ka 58-Churachandpur u la pan mab haslor kane ka jinglong jingman bad pyntip ba kin sa pynbeit da kawei pat ka prokram.
