Ka hukum ka SC ka long kumba ngi khmih lynti: Conrad
Shillong, K’lyngkot 07 : U Myntri Rangbah ka Jylla Conrad K Sangma hynne ka sngi saitjain, ula ong ba ka hukum jong ka Iingkashari Supreme Court ba pynsangeh ia ka hukum ba shipor ka Iingkashari Meghalaya High Court ban pynsangeh ia ka jingtreikam jong ka Memorandum of Understanding (MoU) pynbeit pud hapdeng ka Assam bad Meghalaya, ka long kat kum ka jingkhmih lynti jong ka Sorkar.
Haba iakren bad ki nongthoh khubor, u Conrad ula ong ba ka Sorkar kala sngewthuh shai bha ba ka hukum ba shipor jong ka Meghalaya High Court kan sa shah pynsangeh ha ka Iingkashari Supreme Court.
“Ngi la leit mudui sha IIngkashari Supreme Court bad kumba khmih lynti, kane ka Iingkashari kala pynsangeh ia ka. Kala poi kat kum ka jingkhmih lynti jong ngi” ula ong.
Hynnin ka sngi thohdieng, ka Iingkashari Supreme Court kala pynsangeh ia ka hukum ka Iingkashari Meghalaya High Court ba iadei bad ka jingtreikam jong ka MoU bala iasoi ban pynbeit pud hapdeng ka Assam bad Meghalaya, kaba iadei bad ka jingphiah ia u pud u sam bad ka jingpynieng ia ki mawpud hapdeng ki ar jylla.
Ka Iingkashari u Chief Justice of India (CJI) DY Chandrachud, PS Narasimha bad JB Pardiwala kila phah notice sha ki nong shah mudui halor ka jingkyrpad ban tuklar da ka Sorkar Meghalaya bad kala buh Tarik ban shong bishar kham bniah ia kane ka kam hadien artaiew.
“U Single Judge u khlem ai kano kano ka daw halor ka hukum ba shipor, bad la ka MoU kan donkam ia ka jingmynjur ka Parliament ka dei kawei pat ka kam ba hap khmih. Hynrei ka hukum ba pynsangeh ia ka MoU kam pat donkam satia. Namar kata, ia kane ka hukum ba shipor u Single Judge la pynsangeh noh” hukum ka Iingkashari.
Ha kawei pat ka liang, u Myntri Rangbah ula ong ba ka jingiakren pynbeit pud jong ka wat kaba ar kala iaid hala ka jong ka lynti.
“Ngi la iakynduh ia shibun ki jingeh ha ki por bala leit. Namar kata, ngi hap ban pynbeit ia kine ki jingeh bad kito ki jingjia kiba la jia baroh lem kumta ngin ym lah ban jam shakhmat. Ngin ym lah ban pynlong ia ka jingiakren” ula ong.
Haba kdew ia ka jingshah ther kuli ki paidbah ha shnong Mukroh kaba jia ha ka 22 tarik Naiwieng 2022 ka dei kawei na ki jyrwit jyrwat na ka bynta ka jingiakren pynbeit pud hapdeng ki ar jylla, u Conrad ula ong “Hynrrei kane kam mut pat ba ka jingiakren kan sangeh noh, kam mut ruh ba ngin ym iai buddien ia ka kam pynbeit pud”.
Haba kular ba ka Sorkar jong u kala kut jingmut ban buddien ia ka jingiakren pynbeit pud bad ka Assam, u Myntri Rangbah ula ong “Ngin iai buddien ia kane bad ngin pynthikna ba kan poi shaduh kaba kut..ka dei tang ka NPP bad ka dei tang kane ka Sorkar kaba la shim ia ka sienjam ha kine ki 50 snem ban wad ia ka lynti ban lah pynbeit noh ia ka jingiakajia pud”.
“Ngi la lah ban leh ha ka wat kaba nyngkong bad ngi kyrmen ba lada ki paidbah kin ailad biang bad ia ka jingkyrshan, ngin sa lah ban pynbeit ia kane ka jingeh ha ka samoi ban wan” ula bynrap.
