Shillong, K’lyngkot 27: Ka Iingkashari Supreme Court kala pynsangeh ia ka jingtreikam jong ka hukum ka Iingkashari Meghalaya High Court ba bthah ia ka Sorkar Jylla ban siew bai lutdakn ba kot haduh T.10-15 lak ia kiba iap ha along jong ki Pulit.
Kane ka hukum ba pynsangeh bala pynmih ha ka 22 tarik Kyllalyngkot 2024, ka kren shai ba ka hukum jong ka Iingkashari High Court kan iai sangeh shuwa ia ka jingtreikam hynrei halor ka kyndon ba ka bai lutksan bala buh da ka National Human Rights Commission (NHRC) ka dei ia kaban siew da ka Sorkar Jylla.
Ia kane ka jingmudui jong ka Sorkar Jylla la shim rai da ka Iingkashari Supreme Court ba kynthup ia u Justice BR Gavai, Sanjay Karol bad Sandeep Mehta haba bthah ban file hapoh ka saw taiew.
Ha u Nailar 2023, ha ka suo moto case, ka Iingkashari Meghalaya High Court kala pynpaw ia ka jingsngewkhia halor ka jingiap jong ki Under-Trial Prisoner namar ka jingpynshitom ba palat pud jong ki bor ba tohkit. Kala rai ba ka jingiap ki koidi ha along kan kut tang lada ka jingsiew bai lutksan ka poi ha u pud ha kaba ka Sorkar Jylla kan hap ban siew ia ka jingsiew bai luksan kaba heh.
Haba kyntait ia ka ‘Haryana Model’ ban siew ban lutksan da ka NHRC, ka Iingkashari High Court kala ban jur ia ka jing donkam ban siew bai lutksan ka ban ai jingkyrshan ia ki longiing jong ki lanot bad ruh ban tehlakam ia ki Ophisar jong ka Jylla.
Ka Iingkashari kala buh ia ka bai lutksan kaba long naduh T. 10-15 lak kaba shong ruh kat kum ka rta jong ki lanot. la ki lanot kiba hapoh 45 snem, ka bai lutksan ka long T. 10 lak katba kito kiba hapdeng 30-45 snem kidei ban ioh T. 12 lak. Ia kito ki lanot kiba iap hapoh ka 30 snem ha along ki Pulit, ka jingsiew bai lutksan ka long T. 15 lak.
Kane ka rai kala pynbor ia ka Sorkar Meghalaya ban leit mudui sha ka Iingkashari Supreme Court.
Ha ki kam ba iadei bad ka jingiap ha along Pulit, ka National Human Rights Commission ka Ri India (NHRC) kala buh ia ka jingdawa ban siew bai lutksan kaba long T. 3 lak.
