Shillong, Jymmang 19: Ka Iingkashari Meghalaya High Court kala pynsangeh shuwa shipor ia ka “Lehniam Raid Mylliem” kaba la buh ban long ha ka19 tarik Jymmang, haba pynpaw ba ka don ka jingsyiem ba lah ban pynmih ki jingkulmar na ka jingkajia halor ka jingiashimbynta u Myntri bala long niam Khristan ha ka lehniam leh rukom ki Khasi.
Haba pynmih ia ka hukum ha ka sngi Nyngkong, ka kashari u Justice W Diengdoh kala bthah ia u Syiem ka Hima Mylliem bad kiwei kiba don bynta ba kin pynsangeh shuwa ia ki jingpynkhreh baroh na ka bynta kane ka jinglehniam kaba lah buh ban long ha ka jaka kyntang bala tip kum ka Mawnarian bad Lei Shyllong ka Mylliem.
Ki nongmudui, Kyrshon Marbaniang bad kiwei, kila pynpaw ba kane ka lehniam ba shisien shisnem ka dei kaba “snoh tynrai bad ka jingiada ia ka jingngeit bad jingleh rukom jong ka jingngeit tynrai/ niam, kata ka, Niam Khasi” bad dei ban pynlong da ki nongbud jong ka niam.
“Kum kine ki jinglehniam ka don jingiadei beit beit bad ka kamjong ka Niam Khasi, kumta, ka jingbud ia kajuhkan long khlem pep ia kito kiba bud ia ka niam Khasi, ka jingleh niam ia kajuh ka long kaba la pynskhem hapoh ka Article 25,26 bad 29 jong ka Riti Synshar ka Ri IIndia” ong u nongiasaid jong ki nongmudui, N Syngkon.
Ki nongmudui kila kynthoh ba u nongshah mudui No 4, u Myntri ka Hima Mylliem ba mihkhmat ia ka 5 Kur, 11 Kur “u dei da ka jingngeit,u Khristan, bad kumta, um shym la bud shuh ia ka jingngeit tynrai lane ka niam Khasi”.
“Namar kane, kan long ka jingleh bakla ia kum une u briew ban pyniaid ia kane ka jinglehniam ba kyntang bala kdew haneng, hadien ba u la kylla long uba khlem bor ban pyndep ia katei ka kam niam namar ka jingngeit niam shimet jong u kaba iaid pyrshah ia ka jingbthah ban pyndep ia katei ka ‘leh niam Raid Mylliem’,” la ong u nongiasaid.
Ki nongmudui kila file ruh la ka jong ka writ petition WP(C) No. 197 of 2026 ba pynpaw ba “tang ki briew/nongmihkhmat kiba dei jong ka niam Khasi napdeng ki 5 Kur bad 11 Kur, ki lah ban iashimbynta ha kane ka jinglehniam ka ban wan” bad kito kiba la kylla sha ka niam Khristan kin ym lah shuh ban shimbynta.
U nongiasaid jong u Syiem ka Mylliem, L Khyriem ula pyntip ia ka Iingkashari, ba kam don satia ka jingkyrkieh naba ia kane ka kam la buh ban bishar ha ka 19 tarik Jymmang.
U pyntip ba u Syiem ula pynlong ia ka jingialang ha ka 8 tarik Jymmang 2026, ha kaba ki nongmudui kila iadonlang. Ha ka jingialang, “u Syiem ula kyntu ia baroh kiba don bynta ba kin iashimbynta ha kane ka jinglehniam kynthup ki Myntri ki 5 Kur bad 11 Kur/ nongshah mudui No 4”.
U Justice Diengdoh u la ïohi ba ka mat ba kongsan ka kynthup ïa ka “bynta kaba khia bha jong ka jingngeit bad rukom ngeit bad ka jingbud ryntih ïa ki riti dustur, ki jingleh tynrai bad ka rukom leh niam jong kano kano ka jaitbynriew” bad hap ban rai ha ka writ petition.
Ka Iingkashari kala bthah ba ki nongshah mudui No 3 bad No 4 bad baroh kito kiba don bynta ha ka jingpynkhreh ban pyniaid ia kane ka jinglehniam, la bthah ba kin shimkhia ia kae ka hukum bad ban leh ia kaei kaba la bthah.
