Shillong, Nohprah 11 : Ka concert kaba dap smam bad kaba khring iaki riewieid jingrwai ban iohi ia u Bryan Adams da la ki jongki khmat, da shisha ia baroh kiba poi sha ka concert, ka dei kaba shongdor kat kum ka jingpynlut bad man ka kynta ba ki iai shah ia ka jingkhriat jong ka miet u bnai Nohprah ha Shillong-ka dei kaba shongdor shisha.
Une u Nongrwai ba pawnam ka Canada bala 65 snem, ula pynshoh biej ia ki paidbah da ki sur jingrwai ba khlem iapher wat hadien bala noh ka rta, kaba la pynpar niangkhriat ia baroh. Uwei u samla ula ong “Sngew thik kumba rwai ha cassette”.
Haba u kiew ha rynsan, u Bryan Adams ula mad ia ka jingkhriat jong ka suinbneng ha Shillong da ka jingsammut bad ong “Ngam poi pyrkhat ba ka Shillong kan khriat haduh katne”. Hynrei, kane ka miet ba khriat kala kylla syaid tang shipor, tang mar syn sdang ka jingput jingtem kaba la sawa na rynsan.
Haba kren shaphang ka guitar, ki paidbah kila shu peit iap biej ia u Bryan Adams bad kumjuh ruh ia u lead guitarist Keith Scott.
U Bryan Adams mynta u dang don ha ka tour ban pyniaid iew ia ka album ba dang shu pynmih thymmai “So Happy It Hurts”.
Ka jingshongshit u paidbah kala thnem bha ha ka por ba une u nongrwai ula rwai ia ka jingrwai ba pawnam kum ka Heaven, Please Forgive Me bad ka jingrwai ba shongshit tam jong u kaba baroh ki iatip lut ia ki kyntien- “Summer of ’69. Kam pher ia ka rta, baroh ki paidbah kila kyr-iuh naphang ban iarwai lang ia kawei pa kawei ka kyntien ryngkat u Bryan Adams.
Ka Kynhun tem ba pawnam ka Shillong-ka Snowwhite kala plie ia kane ka concert u Bryan Adams da ki jingrwai ba paw nam jong ka bad kumjuh ruh ka Blue Temptation.
Haba pynkut artad ia ka concert, ki paidbah kila pynmeh iala ki flashlight jong ki mobile ban khaweh ha suin, kaba pyni shai ba kane ka dei tang ka concert hynrei ia baroh kiba iapoi sha madan, ka dei shisha ka miet ka ban sah jingkynmaw.
