Shillong, Nailar 25 : U Myntri ka Koit ka Khiah Bah Wailadmiki Shylla ha ka sngi Ba-ar ula ong ba haduh 50 ngut ki samla pule la pynrung klas ha ka snem pule ba nyngkong jong ka Shillong Government Medical College.
Haba jubab ia ka jingkylli jong u Nongialam ka Liang Pyrshah Dr Mukul Sangma ha Iingdorbar Thaw Ain, u bah Wailad ula ong ba ka jingtei na ka bynta ka College ka long kat kum ki kyndon ka NMC MSR 2023, ia kaba ki jingtip ba bniah lah wanrah hapoh ka Iingdorbar.
U ong ba ka Sorkar kala sanction haduh 179 tylli ki kam na ka bynta ka medical college-kynthup kawei ia u Director, Dean, Medical Superintendent, Chief Administrative Officer, Clinical Psychologist, Statistician bad Chief Accounts Officer-cum-Financial Advisor.
Ha ka kam nonghikai, 17 ngut ki dei ki Professor, 27 ngut ki Associate Professor, 41 ngut ki Assistant Professor, 40 ngut ki Senior Residents, 22 ngut ki Junior Resident bad 25 ngut ki Tutor/Demonstrator.
Ka College kala sdang treikam naduh u snem pule 2025-26.
