Shilong, Rymphang 19 : U Myntri Rangbah ka Jylla Conrad K Sangma ula pyntip ha Iingdorbar ha ka sngi Palei, ba haduh 817 tylli ki shnong bad 427 tylli ki kyntoit la register hapoh ka Meghalaya Residents Safety and Security Act (MRSSA), 2016 bad kane ka kam ka dang iaid shaid shaid.
“Ka bynta kaba ar, kaba dei ka jingpynrung kyrteng bad peitthuh ia ki briew kiba wan sha Jylla, kane ka bynta kan nang bteng. Nga lah ban kular ia ka Iing” ong u Conrad haba jubab ia ka resolution bala wanrah da u Nongialam ka Liang Pyrshah.
Ula pynsngew ia ka jingiaid ki kam naduh u snem 2018, haba pyntip ba ka Sorkar kala sdang pyntreikam ia ka Act bad kala pynieng ia ki facilitation centre (lane entry-exit point), hynrei lah mad jingeh haba ka Iingkashari kala pynduh ia ka.
U Conrad ula ban jur ia ka jingdonkam ka jingiapyrshang lang da kaba ong “Kane kan jia tang lada ngi baroh ngi iatreilang. Baroh kin hap ban iapyrshang lang”.
Ula pynpaw ba ka jingpynrung ia ki shnong ha ka MRSSA ka dei ka kam kaba bun bah khamtam ba ka Jylla ka don ia palat 7000 tylli ki shnong bala dep lum thup.
U CM ula kular ba ka kam kala iaid shakhmat ryngkat ka jingthmu ban pyniar ia ka jingpynrung kyrteng ia ki shnong sha kiwei kiwei ki bynta jong ka Jylla.
