Shillong, Lber 19 : Ka thma ktien hapdeng ki seng sain pyrthei kala nang thnem nang thnem katba ka sngi thep vote sha ka elekshon Lok Sabha ka nang jan.
U Kyrtong ka Regional Democratic Alliance (RDA) Bah Robertjune Kharjahrin, ula sdang ban kawang ktieh ia u kyrtong jong kawei ka seng riewlum namar ka jingbym bud ia ka dustur u Khasi bad ai jait sha ka ‘Kmie’.
Ka RDA ka dei ka kynhun synrop hapdeng ka United Democratic Party (UDP) bad ka Hill State People Democratic Party (HSPDP), ha kane ka elekshon Lok Sabha.
Haba kren ha ka jingialang paidbah ha Ranikor, South West Khasi Hills, u bah Robertjune ula pynrem ia u kyrtong uba shim jait ialade na u Kpa, kaba long pyrshah ia ka dustur u Khasi. Ula ong ba u briew u bym burom iala ka jong ka riti ka dustur u long kum u dieng bala iap ki thied.
“Ki don artylli ki seng riewlum kiba iakhun ia ka elekshon Lok Sabha na Shillong-I Parliamentary seat” ong u bah Robertjune haba bynrap “Kaba thamula ka long, uwei uba bud ia ka dustur u Khasi da kaba shim jait na ka Kmie katba uwei pat u dei uba shim jait na u Kpa. Ki paidbah ki dei ban wad ia kane bad sa shim rai”.
U Bah Robertjune ula ban jur ba kum kine ki kam kim dei satia tang ki buit ialap elekshon ne jingkawang ktieh hapdeng ki seng riewlum hynrei ka dei kaba la pynshong nongrim ha ka jingshisha.
Nalor kane, u Bah Robertjune ula kren ruh ia ki nongrim jong ka RDA ban pynkhlain ia ka Sxith Schedule, ban aibor shuh shuh ia ki District Council hapoh ka Article 200, ka ban ai jingiada bad pynneh pynsah ia ka dustur ai jait kmie jong ka Jaidbynriew Khasi.
 Bah Robertjune Kharjahrin, ula sdang ban kawang ktieh ia u kyrtong jong kawei ka seng riewlum namar ka jingbym bud ia ka dustur u Khasi bad ai jait sha ka ‘Kmie’.){kind=link}