Shillong, Iaiong 29: U MLA ka BJP na South Shillong Constituency Bah Sanbor Shullai, ula pynrem jur ia ki riewshim kabu kiba kawang Petrol Bomb ia ka iingsah jong u Symbud Myntri Rangbah ka jylla Bah Sniawbhalang Dhar kaba la jia ha ka taiew bala dep.
U Bah Sanbor, ula ong ba kum kine ki jingleh ki dei tang ki kam pyntieng pynsmiej ia ki nongshong shnong bad ka long ka bym iahap satia bad ka sorkar jylla kam dei ban pyndem ha kino kino ki jingpynibor. U la ong ba kum ka nongpeit bad nongpyniaid iaka jylla ka dei ban leh da kaba tyngeh khnang ba kan nym don shuh kano kano ka jingpynthud ia ka shongsuk shongshngain ha ka jylla.
Ula ong ba ka BJP kam lah ban pdiang ia kino kino ki kam isih ne shun ha ka imlang sahlang bad kam don satia kano kano ka kot niam kaba khuid ne ki riewngeit kaba hikai ban shim ia ka jingim jong kiba lui lui.
“Kano kano ka kynhun kam dei satia ban iada ia uno uno u riewshimet uba donkti ha ki kam runar ha ka imlang sahlang” ong u MLA ka BJP bad ka ong, “Ngi ioh ia ka jingiada na ka Sixth Schedule jong ka riti synshar ka ri kum ka jaidbynriew kumta ngim dei ban shah ialam bakla ha kino kino ki jingpynsngewthuh bakla kiba la ialam da kino kino kiba don jingmut ban pyniashrut ne pyniashun”.
Ula ai jingmut ba baroh ki seng sain pyrthei kynthup ia ki Liang Pyrshah kidei ban mih shakhmat ban pyntikna ba ka aiñ kan ieng skhem bad kino kino ki kam thombor dei ban sangeh khnang ba kan ym don kano kano ka jingktah ia ka shongsuk shongsaiñ ha ka jylla.
“Kiba donkti ha kane ka kam be-aiñ, kidei ban shah pynshitom katkum ka kyndon aiñ bad ka sorkar kadei ban shim ia ki lad ki lynti ban pyntikna ba baroh kidei ban ioh ia ka hok,” ong u Bah Sanbor ha ka kyrwoh khubor.
U la bynrap ba ki bor pulit ruh ki dei ban leh ia ka kamram katkum ka ain khnang ba baroh kin ioh ia ka hok.
