Shillong, Naiwieng 25: Ka Synjuk Ki Rangbah Kur Ka Bri U Hynñiewtrep hynne ka sngi ka pynrem jur iaka jingleh riewkhlaw ki pulit ka jylla Assam kaba la wanrah ka jingkhlad noh 6 ngut ki briew hapoh ka shnong Mukroh West Jaintia Hills.
Ka kyrwoh naka Synjuk Ki Rangbah Kur Ka Bri U Hynñiewtrep ka kdew ba iaka jingjia hapoh ka shnong Mukroh haka step jong ka 22 tarik mynta u bnai ym lah ban pdiang bad kum kine ki jingjia kin nym jia lada ki bor ka ain ki pyndonkam iaka bor bad iaka kamram kumba la pynkhamti iaki daka ain.
“Hynrei kumba iohi na kane ka jingjia, ki bor ka ain kim nang ban pyndonkam hok iaka bor kumba la pynkhamti ha ki” la ong u president ka Synduk u bah Aristotle Lyngdoh.
Ka Synjuk ka phah ka kyrwoh sngewlem sha kito ki longïng duh noh iala ki ba ieid ba thoin bad kumjuh ruh sha kito kiba dang don hapdeng ka jingshah sumar bad ka kyntu iaki sorkar jylla ban wanrah noh ka jingshong suk shong shngain hapoh ka shnong Mukroh.
Shuh shuh ka Synjuk ka kyntu iaki khun samla ban kiar na ka jingwanrah ia ka jingkulmar hapoh ka jylla khamtam ha nongbah Shillong namar kane ka ktah iaka kamai kajih ki paidbah bad ka kyntu ruh ban nym wanrah kano kano ka jingiasngewpher jingmut para jaidbynriew.
“Ngi donkam ban don ka jingshaniah ha ki sienjam ba ka sorkar jylla Meghalaya bad Assam kiba la shim ban phah tohkit daka CBI naka bynta ban tih iaki daw ba wanrah ia kane ka jingjia ba sngewsih hapoh ka shnong Mukroh” la ong ka kyrwoh.
