Shillong, Naiwieng 22 : Ka National People’s Youth Front (NPYF) kala pynrem jur ia ka jingther kuli jong ki Pulit Assam ia ki riew paidbah ha shnong Mukroh, West Jaintia Hills kaba lam sha ka jingiap haduh 5 ngut ki nong Mukroh.
Ha kane ka jingjia hynriew ngut ki briew kila iap ba kynthup ia uwei u Forest Guard jong ka Assam.
U National President ka NPYF Bah Nicky Nongkhlaw ula ong ba ki Pulit jong kino kino ki Jylla ki dei na ka bynta ban ai jingiada ia ki Nongshongshnong kam pher ia u pud u sam. Ula ong ba kane ka jingthombor jong ki Pulit Assam kam dei satia tang ka jingthombor iaka hok jong ki paidbah hynrei ka jingma ia ka riti synshar paidbah.
Ula ong ba ka jingsiat iap ia ki riew paidbah kam dei dalei lei kaba lah ban said hok ha kano kano ka rukom.
Haba pynpaw ba watla ka Sorkar Assam bad Meghalaya ki dang iawad ia ki lynti ban pynbeit noh ia ki jingiakajia pud bala neh da ki phew snem, ula ong ba kum kine ki jingjia ki dei ki jingbym burom ia ka jingpyrshang ban wanrah ia ka jingiapynbeit.
Ka NPYF kala dawa ban leh eiei mardor pyrshah ia ki Pulit kiba donkti ban siat kaba lam sha ka jingduh ia ki mynsiem briew.
