Dimapur, Risaw 03: Ka Naga Students’ Federation (NSF) kala pynrem jur ha kaba iadei bad ka jingpynjlan jong ka sorkar pdeng ia ka ain iakjakor ba la tip kum ka Armed Forces Special Powers Act 1958 ha kiba bun ki bynta jong ka Nagaland sa na ka bynta hynriew bnai kynthih halor ka nongrim kaba iadei ban tehlakam ia ki jingeh kiba ktah ia ka shongsuk shongsain.
Ka Federation ha ka jingthoh bala pyllait da u president u Kegwayhun Tep bad u general secretary u Siipuni Ng Philo ha ka sngi Saitjain ba la lah kila pynrem jur ia kane ka jingpyrshang jong ka sorkar pdeng ban pynjah burom ia kane ka jylla kum ka jylla ka bym don ia ka shongsuk shongsain.
Ka sorkar pdeng ha ka 30 tarik u Nailur ba la dep kala pynbna ia ki khyndai tylli ki district bad 16 ki police station ha ki saw tylli ki district ka Nagaland kum ki jaka kiba don hapdeng ka jingiakynad ne “disturbed area” naduh ka 1 tarik u Risaw 2022.
Katei ka jingthoh bala pynmih da ka Federation kala ong ba ka jingshisha hi ka pyrthei baroh kawei ka iohi ia ka Nagaland kum ka jylla kaba itynnad bad kaba shong shnong da ki briew kiba im hapdeng ka jingsuk bad kaba long pyrshah ia katei ka jingpynpaw jong ka sorkar pdeng.
“Ka histori kaba iadei bad ki kam lehbor jong ki shipai pyrshah ia ki nongshong shnong ka Nagaland lyngba ka ain AFSPA ka khot na ka bynta ka jingpynrem jur na baroh ki nongshong shnong jong ki ri ka pyrthei,” ong ka NSF.
Nalor kata ka Federation kala iai ban ruh halor ka nongrim kaba hashwa kaba pynpaw ba ki nongshong shnong ka Nagaland kim pdiang satia ia kane ka ain iakjakor kaba la ai bor ia ki shipai India bad kiwei pat ki tnat pahara ba kin leh ia ki kam pyntriem kiba harukom, kata kum ha kaba kem naphang, pynshitom bein bad ban pyniap dusmon.
Katkum ka NSF kane ka ain AFSPA ka long pyrshah ia ki riti synshar khadar jong ka ri namar kala shu pynshlur ban leh ia ki kam thombor kiba long ki jingpynkhein ia ki kyndon kiba iadei bad ki hok longbriew manbriew da ki bor shipai.
Kumta ruh na ka liang ka federation ka kyrpad ia ka sorkar pdeng ba kan bishar bniah halor ka jinglong jingman bad ban ym shim tang lyngba ki kaiphot ba shah liang na ki kynhun syntiat bapher bapher ki jong ki.Nalor kata ka kyntu ruh ia ka tnat kam pohiing ka sorkar pdeng ba kan shim ia ki sienjam kiba dei khnang ban pynthikna ba ia kane ka ain dei ban weng noh shisyndon na ka jylla Nagaland.
