Shillong, Nailar 14 : Ka Iingkashari Meghalaya High Court kala pynrem ia ka jingiaid suki ki kam ba iadei bad ka project ban pynheh ia ka kad liengsuin ha Umroi (Shillong Airport) bad bthah ia ki bor ka Sorkar Jylla bad Sorkar Pdeng ba kin pynsted noh shaid shaid khnang ban pynthikna ia ka jinglah pyndep kham kloi kat kaba lah ia ka project.
Ka Division bench ba kynthup ia u Chief Justice IP Mukerji bad Justice W Diengdoh kala pynpaw ia ka jingbynniaw halor ka jingbym don ka jingshimkhia bad jingleh kyrkieh na ka liang ka Sorkar Pedng bad Sorkar Jylla ha kaban lah pynurlong ia ka thong ban pynheh ia kane ka kad.
“Ngi la ioh pdiang ia ka jingthoh ba lyngkot na u Additional Advocate General na ka bynta ka Jylla. U Deputy Solicitor General ruh ula ai ia ki jingthoh. Kaba pynbynniaw ka long ba la paw na kine ki jingthoh, ba watla ka Sorkar Pdeng bad Sorkar Jylla ki tip bha ia ka jinglong kongsan ban pynheh ia kane ka kad liengsuin hynrei ka jingshim khia bad jingleh kyrkieh ha kaban pynurlong ia ka thong kam shym la paw satia na ki kaiphod ba ngi ioh pdiang” ong ka Iingkashari ha ka hukum.
Ka ong ba ka Sorkar Jylla kala pyllait ia ka pisa ba T. 72.17 klur ban thied ia ka jaka ba 11.75 acre hynrei kam shym la don satia ka jingiasoi soskular bad ki trai jaka bad ka jingphah ia ka pisa sha District Rural Development Agency ka paw ba ka long tang ka sienjam ban pyndep rukom.
“Kam shym don kaei kaei ruh hynrei tang ka jingphah pisa na ka Jylla sha ka Jylla. Kam shym don ka jingiasoi soskular halor ka jingdie ia ki jaka bad kino kino ki liang mamla khlem da iakren ban aiti ia ki jaka sha ki. Ngi sngew lyngngoh ba lano kane ka jingphah ia ka pisa yn pyndonkam ha kaban thied ia ki jaka”.
Ka Iingkashari kala kdew ruh ba ki bor shipai kila shah ban pyndonkam ia ki katto katne ki bynta jong ki jaka ba ki bat, hynrei ka jingpruid dak ia u pud u sam hapdeng ki shipai bad ka Jylla ka dang iaid mynta.
“Ki bor shipai ki bha palat ban shah ha kaban pyndonkam ia shibynta na ka jaka jong ki na ka bynta kane ka kam. Kat kum ki kaiphod, tang ka kam ban iaphiah ia u pud hapdeng jong ki bad ka Jylla ka dang iaid. Kam pat shym don satia ka jingpyn beit ia u pid bad jingaiti ia kane ka jaka ban pyndonkam ka Kad liengsuin” kala ong.
U Deputy Solicitor General, Dr Mozika ula pyntip ia ka Iingkashari ba ka Airport Authority of India (AAI) kan lah ban pyndep ia ka jingai contract ban pyntrei ia ki jingtei bad u contractor tang hadien ka jingioh jingbit na u Director General of Civil Aviation, ban ioh ia ka Environmental clearance bad ka jingthied ia ki jaka na ka bynta ka kad liengsuin.
Ia ka Environmental clearance la khmih lynti ban ioh hapoh ka 31 tarik Risaw 2025 katba ka jingai jingbit na u Director General ka Civil Aviatia ka dang sahteng.
“Namar kane, ngi lah tang ban bthah ba dei ban pynsted noh ia ki sienjam bala shim da ka Sorkar. Ka por kala dei ba kane ka project kaba la wanrah na ka bynta ka jingmyntoi ka Jylla, ban pyndep noh kham kloi kat kaba lah” bthah ka Iingkashari haba bthah ia ka Sorkar Jylla bad Sorkar Pdeng ba kin ai ia ka kaiphod halor ki sienjam ba kila shim (action taken report) hashuwa ka sien shong bishar ka ban long la 8 tarik Nohprah 2025.
 bad bthah ia ki bor ka Sorkar Jylla bad Sorkar Pdeng ba kin pynsted noh shaid shaid khnang ban pynthikna ia ka jinglah pyndep kham kloi kat kaba lah ia ka project.){kind=link}