Shillong, Rymphang 16: Ka Hynniewtrep Youth’ Council (HYC) hynne ka sngi Nyngkong, kala kynthoh tyngeh ia u President ka CongressBah Vincent H Pala halor ka jingkam ba ka thain khappud bad ka ri Bangladesh ka long kaba la shngain bad ka jingsheptieng ia ka jingwan rung kyrthep ka dei tang ka jingsngew, haba kam ba kane ka jingkren kadei ka bym don satia ka jingkitkhlieh bad ka bym iahap ruh bad ka jingshisha.
Ha ka kyrwoh khubor, u President ka HYC u Bah Roy Kupar Synrem ula ong ba ka jingkren u Bah Pala kadei tang ka jingniew bein ia ka jingshisha kaba mad da ki jaidbynriew trai ri.
“Ban kam ba ka thain khappud ne International Border ka long kaba la shngain pura, kadei tang ka jingniew bein ia ka jingmad ba shisha jong ki jaidbynriew trai ri trai muluk jong ka Meghalaya,” ong u Bah Synrem bad ka ai nuksa ba ka jingrung tuh ha ki jaka khlaw kiba rben ha ka khappud jong ka ri Bangladesh bad India, ka jingdon ia ki kot ki sla thok, ka jingwan kyntur pud ia ki khlaw ki btap bad ki jaka jong ka jaidbynriew bad ka jingkiew jong ka jinglong jingman ka jaka na ka jingbuhai ki briew.
“Lada ka thain khappud kadei shisha kaba la shngain pura, balei ka don ka jingiai bteng ban kurup, kem bad ban phah leit phai biang ia kiba wan rung tuh ka dang iai jia? Balei ki nongshong shnong ha khappud bad ki sengbhalang ki iai bteng ban long kiba peitngor? ula buh jingkylli.
Ka HYC kala kynnoh ba u Bah Pala ula ai mynsiem ia ka kam rungtuh bad ban pynduna noh ia ka jingsheptieng kaba shisha.
“Ban pynduh ia ka jingsyier jong ki paid trai ri trai muluk kadei tang ka jingialam bakla bad kadei tang ka jingpynsngewthuh bakla ia ka jaidbynriew kaba iakhun na ka bynta ban iada ia la ka jaka, jinglong trai bad iaka hok ha ka kam sain pyrthei” la ong u Bah Synrem.
Ka seng kala buh jingkylli ruh, ba u ai jingmyntoi iano ban kren kumtei, hato kane kadei ka jingpyrshang ban leh politik ia ka jingma kaba shisha jong ka ri bad ia ka mat jingiakhun ka jaidbynriew?”.
Kala bynrap ba ka jingkren u Bah Pala kala buh ia u bad ia ka seng ha ka jinglehrain hakhmat jong ki jaidbynriew trai ri ka jylla Meghalaya bad kala pynkynmaw ia u ba ym shim la kren na ka bynta ka sorkar.
“Ka jingiakhun ban neh ban sah ki jaidbynriew trai ri ka Meghalaya kam dei satia tang ka jingmutdur. Kadei ka jingshisha kaba dawa ban leh da ka kam” la ong u Bah Synrem.
