Shillong, Lber 11: Ka seng Hynniewtrep National Liberation Council (HNLC) ha ka sngi Nyngkong, kala kynnoh ba ka tnad Pulit kala kem ia u Nongialam ka HNYF Bah Tarson Lymba tang halor ki jingpharep ba u donkti ha ka jingpynbthei bomb IED ha Them Iew Mawlong.
Hynrei kane ka Seng, kam shym la kam satia ia ka jingdonkti halor kane ka jingpynbthei bomb kaba jia ha ka miet 9 tarik Lber. Kat kum ka jingong jong ka, uwei pat u briew ba shah kem bala ithuh kum u Ebakordor Nongpluh u dei u Informer ki Pulit.
Ha ka kyrwoh, u General Secretary-cum Publicity Secretary ka HNLC Bah Sainkupar Nongtraw ula ong “Ka HNLA ka pynrem ia ka jingkem ia u dkhot ka HNYF Bah Tarson Lymba halor ki jingpharep ba u donkti ha ka jingpynbthei bomb IED ha Them Metor. Kane ka dei ka buit bala rim, ba tad dor jong ki Pulit haba kim lah ban lap ksai bad rai ban shu kem naphang. U Tarson u shu don bynta ha ka jingiakren iasuk bad um dei satia u dkhot ne u nongkyrshan jong ka HNLC. U dei uba shu synran ia u Bah Sadon (President ka HNYF), u ksiang jong ka jingiakren iasuk”.
“Lada u nongwanrah jingsuk ne ksiang u shah pyndik bad shah kem ha ki bor Pulit, mano napdeng ki kynhun ba don bynta, kin shaniah ia ka rukom treikam lane ka Sorkar haba ka HNLC ka wan phai biang sha ka miej iakren iasuk” ula ong.
U Bah Sainkupar ula kynnoh ruh ba “Kala paw shai ba ka Sorkar kala shu kynnoh bad pyniap ia u Bah Cheris (General Secretary barim), u nongrah ktien”.
“Ka long kaba jah burom ia ki riew sain pyrthei ka Jylla kiba dei ban long kita ki nongiada ia ka riti synshar paidbah hynrei mynta ka Meghalaya kala kylla long ka Jylla ba synshar da ka Sorkar ba pyniaid da ki hehspah (Plutocracy)” ula ong
Une u Nongialam ka HNLC ula ong ba kaba phyllaw, uwei pat u briew ba kyrteng u Ebakordor Nongpluh ula shah kem haba iadei bad kane ka jingjia. “Kat kum ka jingtip jong ngi, u Eba u dei u Informer ki Pulit” ula bynrap.
Haba pynpaw ba ka HNLC kam pyrshah satia ia ka jingsuk, u bah Sainkupar ula ong “Ngim dei ki nongthombor hynrei ki nongshah thombor. Lada don mano mano ka tuh ia ka jaka jong ngi, hato phi tharai ba kin ioh ia ka jingsuk? Ha kine ki 76 snem bala leit, ka India kam pat ju mad ia kano kano ka jingsuk, lane ba kan sa shem ia ka. Ka jingiasuk kam dei kaba lah ban tei na ka jingbym don ka jingle hok, ka jingthombor, ka jingibein, ka jingbym don ain, ka jingshet kylla namar kam don satia ka jingsuk bala tei halor ka jingbym leh hok, ka jingshet jylla, ka jingle beain bad synshar donbor”.
“Nga la pule ia ka histori jong ka Bharat….ka Histori jong phi, bad ka pyni bad phi dei u nongpyniap briew, u nongrung tuh, u nonghiar thma, u nongtuh, u nongrahbor, u riew shikor, u nongleh beijot bad u riew bymman. Nalor kata, phi la iai pynkhein man ka por ia ki soskular bad pynkhein ia ki jingtehkular ha baroh ki Princely State. Ka long da pyrdet ia phi ban ialap halor ka jingsuk bad jingbym ia umsnam, ka jingbishar hok bad ka synshar khadar da u paidbah” ula ong.
“Phi la don bynta ha ki fake encounter bad ot bein ia ka doh ki dkhot jong ngi. Phi pyniap ia u Bah Cheris, rahbor ia u Sibsing Syiem, pynbor ia u nongialam jong ngi Wickliff Syiem ban phet, set along bad pynshitom ia ki Nongialam ka Bri Hynniewtrep ba phim sngewtynnad.Phi lah ban pyrkhat ba ngi sheptieng bad ba ngin phet jngai na phi hynei EM, ngin wan tur sha phi” ong u Bah Sainkupar.f
