Pynrem ka FKJGP ia ka SMB ba khanglad ia ki nongdie sha ba iaid tyrwa sha ha PB

Shillong, Naiwieng 26: Ka Federation of Khasi Jaiñtia & Garo People (FKJGP) Central Body ka pynrem jur iaka jingleh ka Shillong Municipal Board (SMB) ban khanglad iaki Nongdie sha kiba iaid ban tyrwa sha bad jingbam ha ki bynta jong ka Police Bazar, kiba dei ki trai ri trai muluk, da ka jingkam ba ki dei ban ioh jingbit shwa na ka Tnad Municipal.

Katkum ka kyrwoh na u Bah Kitboklang Nongphlang, Vice-President ka FKJGP Central Body u la ong, “Katei ka jingleh jong ka tnad Municipal ka long pyrshah iaka hok kamai jakpoh jong ki trai ri trai muluk namar kiba rit ba ria kiba im sngi da kaba shu iaid tyrwa sha kylleng² ka long ka jing iuhroit bad ka jing thombor im im peit peit khlem kano kano ka jing sngew briew”.

Lada ka sorkar jylla ka don kano kano ka jingthmu na ka bynta ka bit ka biang jong ki Paidbah kala dei ban pyrkhat sani bin pa bin hashwa ban shim ia kino kino ki sienjam kiba ktah ia ka kam kamai jakpoh jong ki trai ri trai muluk. Katei ka jingleh donbor jong ka tnat Municipal lehse kadei tang ka buit poh ban pynhun iano re iano da kaba ia sylla ban khñiot beiñ iaki longkmie khasi na ka bynta ka jing myntoi shimet jongno re jongno, u la ong.

Shuh shuh u Bah Kitborlang u la ong, Kum ka seng kaba ieng ban iada iaka hok jong ki trai ri trai muluk kam lah satia ban shu shong kli kti lane ban shu peitkai halor kine ki jingjia hynrei kan sa bishar bniah ban tih jylliew ia kine kiei kiei baroh ban lap ia ki jingshisha bad na ka liang jong ka seng kan sa shim iaki sienjam ki ban pyntikna ban pynioh pat iaka hok jong ki trai ri trai muluk.

Ha kajuh ka por na ka liang jong ka seng ka maham jur ia kino kino ki tnad jong ki bor sorkar kiba pyrshang ban thombor iaki trai ri trai muluk ha ki dur bula kiba pher bapher na ka bynta ka jingiohnong jong ki briew kiba nabar, la pynkut ka kyrwoh.