Nongpoh, Nailur 27: Hadien shisngi ka jingshah pyniap dusmon ka samla khasi ha u bar jylla ba na ka jaidbynriew Nepali, mynta ka sngi ka Dorbar Shnong Iewmawlong kala mih shakhmat ban pynrem jur ia katei ka jingjia bad dawa na ki bor pulit ba kin pynshitom da kaba tyngeh ia u runar ba leh ia kane ka kam.
Kane ka samla kaba shah pyniap ka dei kaba la tip kyrteng da ka Nisha Nongbet kaba shong ba sah ha Iewmawlong.
Haba kren sha ki lad pathai khubor, u Rangbah Shnong ka Iewmawlong Bah Vicky Syngkli u la pynpaw ia ka jingsngewsih halor kane ka jingjia kaba la jia ia ka longiing longsem kaba duh syndet ia la ka khun kaba shah pyniap dusmon ha u bar jylla u Dilbahadur Thapa u ba la shong sah bad ka la kumba 5 bnai eiei.
“Ka Dorbar Shnong ka pynrem jur ia kum kine ki jingjia kiba la pyntriem ia ka imlang ka sahlang khamtam ia u tei u runar u ba dei na ka jaidbynriew Nepali u ba shongkha bad kane ka samla” ula ong.
Kat kum ka jingong jong u, “Une u briew u dei u ba la shong kurim ruh shawei bad u ju mlien ban byrngem byrsit ia katei ka lok jong u ruh. Ka dorbar shnong ka la dawa ba ki bor ka aiñ kim dei ban pynlait ia u khnang ban lait na kum kine ki jingjia ba sngewsih”.
Une u Nongialam Shnong ula pyntip ba ka Dorbar Shnong kan pyntreikam biang noh mynta iaka hukum ba pynmih ha u snem 2014, ka bym shah shuh ia kino kino ki thei samla ka Shnong ba iashongkurim bad ki bar Jylla ba kin dang shong dang sah hapoh ka Shnong.
“Ngi kyrpad ia ki Khun samla Kynthei ba kin pyrkhat sani bha hashuwa ba kin leit shim ne shong kurim khamtam ia ki bar jylla” ula bynrap.
