Shillong, Nohprah 29 : Ka Confederation of Meghalaya Social Organisations (CoMSO) ka la pynrem jur ïa ka jingshah pynïap beiñ jong u Anjel Chakma, u samla pule MBA ba 24 snem na Tripura, uba la khlad namar ka jingmynsaw ha ka 26 tarik u Naiwieng, 2025 hadien ka jingshah shoh dusmon na ka daw ka jingsngewpher jaitbynriew.
Ka CoMSO ka la niew ïa kane ka jingjia kum shi bynta jong ka “jingleh kaba da pynbeit bad kaba ju jia man ka por” kaba ki briew na ka thaiñ Shatei Lam Mihngi ki ju mad ha kylleng ki jaka Sor ha India, kynthup ha Bengaluru bad Delhi.
Ka seng ka la pynpaw ba ki kyntien ba khatduh jong u Chakma—“Ngim dei ki nong China, ngi dei ki nong India”—ki long kum ka jingkynthoh kaba ktah jur bad ba pynmong shibun ïa ka jingsngew jong ki nongshong shnong jong ka thaiñ.
Ha ka kyrwoh ba la pynmih ha ka sngi Nyngkong, ka CoMSO ka la dawa ia ki sorkar pdeng bad sorkar jylla halor ka jingdonkam ban buh kyrkieh ïa ka jingbishar kaba bishar stet na ka bynta ki runar ba donkti, ha kaba ïa u nongshah kynnoh ba kongsan dei ban ai kloi ia ka jingbishar kaba hok.
Ka la kyntu ïa ka sorkar ba kan thaw ïa ka Aiñ Pyrshah ïa ka Jingsngew ïapher Jaitbynriew (Anti-Racism Act) kaba khlain bha ban ialeh pyrshah ia ki kam thombor na ka jingsngew iapher Jaidbynriew bad ban buh ia ka “North East Helpline” kiba dei ban treikam 24/7 bad ki cell pulit ba kyrpang ha man la ki nongbah kiba heh ban ïada ïa ki samla pule bad ki riew treikam.
Ka CoMSO ka la ban jur ruh ba ki jaka treikam bad ki bor district ki dei ban kitkhlieh namar ba kim lah ban pynbiang ia ka jaka bad ka jinglong jingman kaba shngain ia baroh.
“Ngin ym sngap jar katba ki samla jong ngi ki shah pyniap namar ka rukom long ka durkhmat jong ki. Lada ki nong India ki dang bteng ban niew ïa ngi kum ki nongwei, ki pynkhih ïa ki briew jong ngi sha ka jingsngew ba la shah pynïapher pura” kala ong.
Kane ka kynhun ka maham ba ka long kaba kloi ban iasnohkti lang bad kiwei ki kynhun na ka thain Shatei Lam Mihngi, ban pynlong ia ka jingiakhih ba jai jai lada ym leh eiei ban tehlakam ia kane ka kam sngew iapher Jaidbynriew.
 ka la pynrem jur ïa ka jingshah pynïap beiñ jong u Anjel Chakma, u samla pule MBA ba 24 snem na Tripura, uba la khlad namar ka jingmynsaw ha ka 26 tarik u Naiwieng, 2025 hadien ka jingshah shoh dusmon na ka daw ka jingsngewpher jaitbynriew.){kind=link}