Shillong, Rymphang 03 : U National President ka National People’s Party (NPP) bad Myntri Rangbah ka Jylla Conrad K Sangma hynne ka sngi thohdieng, ula pynrem jur ia u Nongialam ka Trinamool Congress (TMC) bad Nongialam ka Liang Pyrshah Dr Mukul Sangma namar ka jingpyndonkam ia ka bor ban thom bein ia ki paidbah ka Jylla ha ka por ba u dang bat kum u Myntri Rangbah ka Jylla bad niew ruh ia u kum u “Nongialam ba tlot bor”.
“Ki party Liang Pyrshah kiba kdew kti ia ngi bad ong ba ka NPP ka dei kaba tlot, ha ki lehse ka dei ha ka por jong ki ba kila pyndonkam ia ki suloi, kila pyndonkam ia ki Pulit, kiba pyndonkam ia ki bor ban thom beain ia ki paidbah, lada kane ka dei kaba ki ong baka dei ka jingkhlain, ha nga hi ngam mynjur” ong Conrad na ka rynsan ialap elekshon hynne ka sngi thohdieng ha Jowai, uba la pyllait ruh ia ka manifesto jong ka NPP bala ai kyrteng “People’s Document-Vission 2023-20238”.
U Conrad ula ong “Ka long kaba suk ban pyndonkam ia ka bor, ka long kaba suk ban pyndonkam ia ki Pulit bad ban bthah ia ki ba kin siat ia ki paidbah ba lui lui, hynrei kam long kaba suk ban iakren bad ki briew, kren ia ki bad ban shong iakren sngewthuh”.
“Ha ka jingshisha, nga nud ban ong, lada don mano mano kiba tlot, u dei u Dr Mukul Sangma. Ka dei ha ka por jong u ba ha man ki khep kat kaba jia, u jied ban pyndonkam ia ka bor, phah thombor ha ki Pulit ban tehlakam ia kino kino ki jingia leh pyrshah. Kane kam dei ka dak jong u Nongialam” ula ong hapdeng ki paidbah kiba wan ban sakhi ia ki nongialam jong ka Party.
Haba pynpaw ba ki Nongialam ki dei ban niewkor iala ki jong ki nongshongshnong, u Conrad ula ong “Kum u Nongiakam phi dei ban ieid iala ki jong ki briew, phim dei ban buh ia ki ha ka jingma da kaba pyndonkam ia ka bor. Ha kine ki san snem, haba don kano kano ka khep kaba ngi hap ban mad ia ki jingtynjuh, phi lah ban iohi, ngim ju pyndonkam ia ki Pulit ban thombor lane pyndonkam ia ka bor hynrei ngi jied da ka lynti jong ka jingsuk bad jingiakren, ban wad ia ka lynti kumno ban weng ia ki jingeh”.
Ia kane ka jingialap elekshon ha Jowai la pynlong ban pan ia ka jingkyrshan ia u MLA ka NPP na Jowai ma Wailadmiki Shylla, uba iakhun ban pynneh biang ia ka jinglong MLA na kane ka jaka sor ba heh duh ka Ri-lum Jaintia. Ha kane ka jingialang la iashimbynta ruh da u Symbud Myntri Rangbah ka Jylla Bah Prestone Tynsong, u Myntri bad MLA ka Nartiang ma Sniawbhalang Dhar, MLA ka Raliang ma Comingone Ymbon, Kyrtong ka NPP na East Shillong Dr Ampareen Lyngdoh nalor kiwei kiwei ki khlieh nongialam ka party.
Haba ther shuh shuh ia ki jingkynnoh bad jingkhot ia u kum uba tlot, u Conrad ula ong “Ai ba ngan batai ia kine ki nongkynthoh, ka don ka jingiapher hapdeng ka jinglong tlot bad ka jinglong jemnud. Ngi la kylli, ngi sngao iala ki jong ki briew, ngi kwah ban leh ia ki kam da kaba pynthikna ba dei ban don ka jingiakren. Kane kam mut ba ngi tlot. Ka shu long ba ngi don ka mynsiem iala ki jong ki briew. Hynrei ka jinglong jemnud jongngi ym dei ban shim baka dei ka jingtlot lane ba ngim don ka mon. Ngi lahban jemnud bad sngap ia ki paidbah, hynrei ngi don ruh ka mon ban pynthikna ba ngi shim ia ki rai ba tyngeh haba donkam. Ngi sngap ia ki paidbah hynrei ngi leh ia kaei kaba ngi sngew b aka dei kaba biang bad ka dei na ka bynta ka jingbha jong ki paidbah ka Jylla”.
