Shillong, Naiwieng 22 : U Myntri Rangbah ka Jylla Conrad K Sangma hynne ka sngi ba-ar, ula pynrem jur ia ka jingthombor beain jong ki Pulit Assam ia ki riew paidbah hynne ka step ha Mukroh, Block-I, West Jaintia Hills District.
U Myntri Rangbah ula pynpaw ia ka jingsngewlem ia ki lanot bad pynbna ruh ia ka song jingiarap ba mar T. 5 lak sha ki bahaiing jong kine ki lanot haba pyntip ruh ba ki Pulit ka Jylla Meghalaya kila register da ka FIR halor kane ka jingjia.
“Hynriew ngut ki briew kila iap na ka jingther kuli ki Pulit Assam bad ki Forest Guard…Kat kum ka khubor, ki Forest Guard ka Assam bad ki Pulit kila kthong ia kawei ka trok kit dieng ha kaba kila ioh bat ia ka ha shnong Mukroh.Haba iohsngew ia kane, ki nongshongshnong kila iamih paidbah bad ker kut ia ki Pulit Assam bad Forest Guard kaba lam sha ka jingther kuli ha kaba san ngut ki paidbah na Meghalaya kila iap bad uwei u Forest Guard ka Assam.
Ia kiba mynsaw la pynkut noh sha Barato PHC bad Iaiong Civil Hospital” ong u Myntri Rangbah.
U Myntri Rangbah u pyntip ba haba ioh jingtip ia kane ka jingjia, u Myntri kam Pohiing, u District Magistrate, u Superintendent of Police bad ki Magistrate kila hiar mar mar sha ka Shnong Mukroh.
Ula pyntip ruh ba kum ka dak ka jingburom ia kiba iap, ka Sorkar kala rai ban pynsangeh noh ia baroh ki tamasa bala pynlong da ka Sorkar kynthup ka Cherry Blossom.
U Myntri Rangbah u pyntip ba ka Sorkar kan sa shong ia ka jingialang jong ka kynhun Myntri mynta ka janmiet por 5:30 ban shim rai ia kaei ka sienjam ban shim halor ka jingjia ha Mukroh.
U Myntri Rangbah ula kyntu ruh ia baroh ki nongshongshnong ba kin bat ia ka jingshongsuk shongshngain bad ban duwai lem na ka bynta ki longiing jong ki lanot.
“Ka Sorkar kala shim ia ki sienjam ba donkam ban shim ha kaban pynthikna ba ka jingshongsuk kan neh ha Jylla” ong u Myntri Rangbah.
I appeal to all citizens of the State to pray for the departed souls and their families.
I also appeal to our citizens to maintain peace and harmony in the State. The State Government is taking all the necessary steps to ensure that law & order is maintained. pic.twitter.com/LkdSGuHynG
— Conrad Sangma (@SangmaConrad) November 22, 2022
U Myntri Rangbah hynne ka sngi ba-ar ula khot ia ka jingialang ba kyrkieh bad baroh ki Nongsynshar Shnong, ki Nongialam Niam bad ki dkhot ka imlang sahlang, ban iakren halor ka jingdonkam ban ia ieng tylli lang kawei ha kum kane ka khep ba sngewsih kthang ia ka Jylla bad ki nongshongshnong.
Haba kylli halor ka jingbym iohi ia ki Pulit Meghalaya ban don ha katei ka jaka, u Myntri Rangbah ula ong ba ki Pulit ka Jylla kila don hynrei ki don tang khyndiat ngut haba ianujor bad ki Pulit ka Assam.
“Ka Shnong Mukroh kam hap satia hapoh ka jaka iakajia pud bad kane ka Shnong ka dang hap hapoh ka Jylla Meghalaya” ula ong.
“Hooid nga la kren ia u Myntri Rangbah ka Assam, ka jingiakren jong ngi ka long kaba bniah bha bad ula kular ba kaei kaba lah ban leh naka Sorkar Assam bad kaei ka jingdonkam ban iatreilang, u Myntri Rangbah ka Assam un ai ia ka jingkyrshan” ula bynrap.
