I kumba ka HITO bad HYC ki dei ki Political Wing jong ki Seng sain pyrthei
Shillong, Lber 04: U National Vice President ka NPP u bah Prestone Tynsong ha ka sngi Saitjain, ula pynrem jur iaki runar kiba pyrshang ban thaw jingklumar da kaba leit thombor bad jingkawang petrol bomb iaka iing jong ki bahaiing bahasem jong ki MLA na Mawshynrut bad Mawthadraishan.
Ula kynthoh ruh ia ka kynhun sengbhalang ba kynthup ia ka HITO bad HYC ba ki long kum ki Political Wing jong ki seng sain pyrthei bad kiba shah kynshoit hano re hano ban knieh jubor iaka hok kaba la pynkhamti da ka riti synshar ka ri.
“Ka NPP kala jop haduh 26 seat, kumta dei ban sngap bad burom lem ia ka sur jong u paidbah uba jied ia ki nongmihkhmat ha ka elekshon bad kam long kaba dei ban shu pynbor iano iano ban thaw jubor iaka sorkar da kaba leh da ka bor” ula ong.
U Bah Prestone ula ong ba ki runar kidei ban sangeh ia ki kam thombor bad ki pulit kin sa leh ia kaba donkam ia kine ki runar kiba shim ia ka ain hala kti.
“Ngim dei ban long communal ne sngewpher iapher jaidbynriew hapdeng ki Khasi bad Garo da kaba ong ym dei ban long Chief Minister u Garo hynrei ban long da u Khasi. ka HITO bad HYC ki pyrshang ban ialam bakla bad pynthame ia ki paidbah bad ki long kum ki Political Wing jongno re jongno ban pynklumar jingmut ia ki paidbah” ula ong.
Ki seng sain pyrthei kidei ban burom ia u paidbah uba jied ia ki nongmihkhmat.
U Bah Prestone ula pyntip ba u Myntri Rangbah yn bamsmai ha ka 7 tarik ha kaba yn wan ban sakhi lang u Myntri Rangbahduh ka ri u Narendra Modi bad u Myntri Kam pohiing ka ri u Amit Shah.
“Ia mynta ngi don 32 ngut ha ka kynhun bad ka jingiakren ka dang iaid shakhmat bad kiwei kiwei ki seng sain pyrthei ban iatreilang bad ka sorkar kaba ialam da ka NPP” ula ong.
U Bah Prestone ula ong, ka NPP kan pynthikna ban thaw iaka sorkar kaba skhem bad ban ym ioh ban pynjari iaka President Rule ha ka jylla Meghalaya.
