Nongpoh, Rymphang 13: Ka Ri Bhoi Youth Federation (RBYF), Mawhati Circle hynne ka sngi nyngkong, ka la pynrem jur ia ka kompani Dhar Construction Company (DCC) kaba dang pyntreikam shaid shaid ia ka surok na Lad Zagi Road (Umsning) sha Sonidan halor ka jingkynnoh baka pynjulor ia ka mei mariang ban pyndonkam ia ki maw na ki wah ki duid jong ka wah Umiam bad ka jingtih maw na ka quarry kaba don ha ka thain Mawhati.
U Bah Reynold Dkhar, President ka RBYF Mawhati Circle u la kynnoh ba kane ka kompani kala pyntrei khlem akor ia kane ka surok da kaba tih ia ki maw na ka wah Umiam bad kiwei kiwei ki jaka kaba dei ka jingpynjulor ia ka mariang.
Ula ong ba lada mih kino kino ki jingjulor kiba kham jur ia katei ka wah Umiam, na ka liang ka DCC kompani bad ka tnad PWD ki dei ban shim ia ka jingkitkhlieh.
Une u Nongialam ka RBYF ula pynpaw ba ka seng ka dap ruh da ka jingsngewkhia kaba jur halor ka jingpyndonkam jong ka DCC kompani ia ki par maw kiba jan bad ka surok bah ba pyndonkam da u paidbah ha kaba kane ka lah ban buh jingma shikatdei eh ia ka leit ka wan jong ki paidbah khamtam na ka jingkit ia ki maw ha ki dumper jong katei ka kompani kiba iaid khlem da burom shuh ia ki riew paidbah kiba leitba wan sha kane ka thain.
Nalor kane, ka seng RBYF, ka la pynpaw ia ka jingsngewkhia kaba jur halor ka jingkit palat pud jong ki kali dumper jong katei ka kompani DCC kiba ju leit kit ia ki maw bad iaid na ki lynti shnong kiba la shna lyngba ka skhim PMGSY kaba lah ban wanrah ia ka jingjulor noh jong kine ki surok shnong.
Namar kane, ka seng ka la maham tyngeh ba lada kine ki surok shnong ki jot noh tang shiteng por na ka jingiaid jong ki kali kit maw katei ka kompani DCC, kane ka kompani ka dei ban shim ia ka jingkitkhlieh ha ka ban maramot ia kine ki surok PMGSY.
Ka RBYF, Mawhati Circle shen kan sa pynlong ia ka jingleit jurip ia ka jaka jong ka wah Umiam bala khlong maw beain da ka kompani DCC bad lada lap ia ka jingshah pynjulor ka wah, ka seng hi kam banse ban shim pat da ka sienjam kaba tyngeh pyrshah ia ka kompani kaba dang pyntrei ia ka surok Mawhati.
