Shillong, Risaw 19 : Ka Shillong Press Club, kala pynrem jur ia President ka Voice of the People Party (VPP) bad MLA ka Nongkrem Bah Ardent M Basaiawmoit ba kynthoh pynjah burom ia ki nongthoh khubor bad lad pathai khubor haba dawa ruh ba u dei ban panmap mardor lem kumta ki lad pathai khubor kin shim ia kiwei ki lynti ba long pyrshah ia u bad VPP.
Kane ka jingpynrem ka Shillong Press Club, kaba dei ka Club jong baroh ki nongthoh khubor bad lad pathai khubor, kala shimkhia jur halor ka jingkynnoh une u Nongialam ka VPP ba ong ba ki lad pathai khubor hangne ki ai khubor thok bad ki nongthoh khubor ka Jylla ki dei kiba shah thied ban thoh khubor.
“Ka long kaba sngewsih ba u Nongthaw Ain bala shemphang bha,un pynmih ia kum kane ka jingkynnoh ba khlem nongrim ia ki nongthoh khubor halor ka nongrim ba ki ai khubor thok bad kynnoh ruh ba ki nongthoh khubor ka jylla ki dei kiba shah thied ba kin thoh khubor” ong ka kyrwoh ka SPC bala soi da u President Bah David Laitphlang bad General Secretary Powell Sohkhlet.
“Ka long ruh kaba kyndit ban iohsngew ba ula kren sha ki paidbah ba ki lad pathai khubor hangne ki leit lum lum ia ki jingialang ka VPP tang ban ioh kdew bad wad daw bad jingduna kiba don ha ka party” kila bynrap.
Ka SPC ka pynkynmaw ia u Bah Ardent ba ka dei ka kamram jong ki nongthoh khubor ka long ban lum jingtip ba kynthup ia kaba bha ne kaba sniew, kaba shong kat kum ki jingshisha ym ki hamsaia ne khana lorni.
“Ka SPC ka kwah ia u Bah Ardent ban kren shai la ka VPP ka khmih lynti tang ia ki jingtip bad ki khubor ba rahskong ia ka VPP lane la ka VPP ka kwah tang ia ki briew kiba hap ha ka thup jong kine ki jingkynnoh jong u (ba thied pisa) ba kin wan lum ia ki khubor ka VPP nangne shakhmat” kila ong.
Ka SPC ka kwah ruh ban pynkynmaw ia u Bah Ardent ba ka jingbha ka result jong ka VPP ha ka elek shon bala dep ka wan ruh na ka synniang jong ki lad pathai khubor kiba la pynsaphriang ia ki khubor ha man ki rynsan pathai khubor.
“Hato kane ka pyni ba baroh kito ki nongthoh khubor ba lum khubor na ki jingialang ka VPP ha ka elekshon bala dep ki dei kiba la siew da ka pisa lane pynbiej ha kino kino ki dur haduh ban ioh haduh 4 tylli ki seat (4 ngut ki MLA) ia ka party ba dang thymmai hapoh ka jylli sain pyrthei ka Jylla” ong kine ki Nongialam ka SPC.
Namar kane ka jingkynnoh, ka SPC kala dawa ia u Bah Ardent ba un ai ia ka kyrteng jong ki nongthoh khubor kiba la iaid bakla ha ka jingtreikam da ka lynti ka bym dei na ba ka jingkynnoh kyllum lang ia baroh ka long pyrshah ia ka jinglong laitluid bad jingbym shah liang ha ka kam thoh khubor ia kaba ka SPC bad baroh ki lad pathai khubor ka Jylla kila pyrshang katba lah ban bud.
Kine ki Nongialam ka SPC kila ong ba ka jingkynnoh kyllum lang ia baroh ym tang ba ka dei ka kam biej hynrei ka dei ruh ka jingpynjah burom pyrshah ia ki nongthoh khubor ka Jylla.
“Namar kata, ngi dawa ia ka jingpynshai kaba biang bad ka jingpanmap, lem kumta kan pynbor ia ka SPC ban shim ia kiwei pat ki sienjam” kila ong.
