Shillong, Nohprah 27 : Ka Central Puja Committee (CPC) kala pynpaw ia ka jingbynniaw kaba jur halor ka video ba saphrang ha ka rynsan social media ba pyni ia u briew leit rung ha Iingmane Khristan ha Mawlynnong bad pyrta “Jai Shree Ram” na pulpit ka Iingmane.
Une u briew u kyrteng u Akash Sagar, ula la pynphriang ia kane ka video ha ki rynsan social media bapher bapher.
Ha ka sngi Palei, u President ka CPC N Bhattacharjee ula ong “Ngi pynrem jur ia ka kam jong une u briew ba ngi kyrpad ia ki bor District ba kin tohkit bad ban leh eiei mardor kat kum ka lynti ka ain bad ban pynshitom ruh ia une u briew”.
Ula ong ba ka Meghalaya ka dei kaba la tip ha baroh kawei ka Ri ba ka dei kaba bat ia ka jingburom ia baroh ki jait niam jong baroh ki riewngeit kiba sah ha Meghalaya, ia kaba ym dei ban ailad ba kan shah ktah da kine ki kam khlem ka jingkitkhlah jong u briew tang ban pynsniew ia ka jingiasngew shipara hapdeng ki niam bapher bapher hapoh ka Jylla.
