Shillong, Nohprah 19: Ka MLA jong ka East Shillong Constituency, ka ba la ieh kam noh kum ka Nongmihkhmat, ka kong Ampareen Lyngdoh hynne ka sngi nyngkong kala pynrem jur iaki ba kynthoh ba ka skhim FOCUS bad FOCUS plus kadei ka skhim elekshon jong ka National People’s Party (NPP).
Haba kren sha ki lad pathai khubor hadien ba aiti iaka shithi ieh noh kam kum ka MLA, ka kong Ampareen kala ong ba watla kam shym la don bynta bad ka sorkar jylla haba iadei bad ki rai bala shim naka bynta ka jingmyntoi ki paidbah hynrei iaki rai la shim hi haka jingialang ka kynhun Myntri Sorkar (Cabinet) ha ka jingdonlang kiwei ki Myntri sorkar na kiwei ki sengsain pyrthei.
Lah ban kdew ba mynta ka kynti, kila sdang mih ki jingkynthoh na ki sengsain pyrthei ba kynthup ka United Democratic Party (UDP) Youth Wing, Bharatiya Janata Party (BJP) bad naka All India Trinamool Congress (AITC) ba ka NPP kala pyndonkam iaka skhim FOCUS bad FOCUS Plus ban pynbeij iaki paidbah naka bynta ka ilekshon 2023.
“Kiwei ki sengsain pyrthei kim dei ban sait khuid haba iadei bad ka skhim FOCUS bad FOCUS Plus namar iaka rai ban pyntreikam ia kine ki skhim bad ia kiwei ki skhim ki ban ai jingmyntoi iaki paidbah, la leh hadien ba la mynjur lang da baroh ki Myntri Sorkar na kiwei ki sengsain pyrthei” ong ka kong Ampareen.
Ka kong Ampareen kala ong ba kam kwah ban kren eiei shuh halor kane ka jingiakynthoh namar ki don lang ha ka sorkar jylla lait noh ka Congress bad ka AITC namar kim don lang ha ka jingshim rai ban pyntreikam ia kine ki skhim.
