Imphal, Iaiong12: Ki bor sorkar ha Imphal East district ka Manipur hynnin ka sngi ba Ar ki la pynpra noh ia ki laitylli ki iingmane ba la tei beain ha ka jaka sorkar.
Ia kine ki iingmane la pynpra noh khyndiat sngi hadien ba ka iingbishar Manipur High Court ka la pynkut noh ia ka hukum jong ka ban pynneh ia ka status quo, kata hadien ka hukum ba la pynmih da ka sorkar ba la ialam da ka BJP ha ka Manipur ban pynpra ia baroh ki jingtei beain ha ka jylla.
Ia kane ka jingpynpra la pynlong ha ka jaka shongshnong jong ki trai shnong ha ryngkat ka jingpyrkhing pahara hynnin ka sngi ba Ar.
“Ia kine ki iingmane la pynpra noh namar la tei beain ia ki ha ka jaka sorkar khlem da ioh ia kano kano ka jingmynjur ne ka jingai jingbit na ki bor pyniaid district, ” ong u heh sorkar.
Kine ki iingmane kiba la shah pynpra ki kynthup ia ka iingmane jong ka Balang Evangelical Baptist Convention Church, Evangelical Lutheran Church Manipur bad ka Balang Catholic Holy Spirit Church.
Kawei napdeng kine ki balang ka dei kaba la tei naduh u snem 1974, hynrei na ka liang ka sorkar ka la phah ia ka jingtip ban pynpra sha kitei ki balang kynthup ia katto katne tylli ki jaka set kali kiba don marjan ha u bnai Nohprah 2020.
Hadien katei ka jingshah punpra, kiba bun na ki nongshong shnong kiba dei ki Khristan ki la ialum lang bad pynlong jingduwai ha kitei ki jaka mane ba la shah pynpra hynnin ka sngi ba Ar.
