Shillong, Naitung 09 : Kawei ka karkhana coke (bym pat thikna ka dei jong no) kala shah pynpra phom ha ki bor District ka West Khasi Hills ha ka sngi Saitjain namar ka dei ka karkhana kaba shu pynieng bad treikam be-ain.
Kane ka jingjia kala wan jia ruh hadien ba ki Bor District kila kem ia 5 ngut ki trai jong kine ki karkhana coke ba beain dang shen.
Kine ki 5 ngut ki kynthup ia u Youdishtra Bhama khun jong u briew bala ithuh kum ka ‘Mafia’ khaii dewiong beain ba kyrteng u Balwant Bhama uba dei u trai jong ka M/s Kalyani Fuel Limited, ka karkhana coke ba beain ha Shallang.
Ki 4 ngut kiwei pat ki dei u u Hopeful Nongtdu ba na Rymbai Synrang Shahkhain, East Jaintia Hills, u Khrawbok Rongrin ba na Sohbar A, Shallang, u Ashish Arya ban a Basisthapur Bye-Lane, Guwahati, Kamrup bad u Yaman Bansal ban a Beltala Tiniali, Guwahati, Kamrup.
Na kine ki 4 ngut ba dang shu shah kem, u Hopeful Nongtdu u dei jong ka M/s HV Coke Limited bad ki lai ngut kiwei pat ki dei jong ka M/S Yash Coke Limited.
Ki Bor District ki pyntip ba ki don haduh 61 tylli ki karkhana coke ha ki thain Shallang, West Khasi Hills bad napdeng kine, tang 4 tylli ki dei kiba don ia ki kot ki sla kiba biang ban treikam katba kiwei kiwei ki dei ki ba shu treikam be-ain.
Ki pyntip ba bun na kine ki karkhana be-ain la khang khyrdep lut mynta bad ka jingthwet ia ki trai kala iaid shakhmat.
Lah ban kdew hangne ba ka Iingkashari Meghalaya High Court, kala kynther tyngeh ia ka Sorkar Jylla bad ia ki bor Sorkar halor ka jingkhein sting ban leh eiei pyrshah ia ki karkhana coke ba beain bad kumjuh ruh ia ka jing khaii tuh ia u dewiong.
Ha ka 6 tarik Jylliew, ka Iingkashari kala kala suba jur ba dei ki briew na Assam kiba pyniaid ia ki kam tih dewiong be-ain bad seng karkhana coke ba be-ain ha Jylla Meghalaya.
Kane ka jingsuba kala mih hadien ba u Nongai mukotduma Shailendra Kumar Sharma ula aiti ha ka affidavit ba file ha ka 5 tarik Naitung, ia ka thup kyrteng bad phone nombor jong baroh ki briew kiba u ong baki dei ki ‘Kingpin’ ba donkam ban seng karkhana coke be-ain bad tih dewiong be-ain ha Jylla Meghalaya.
Kat kum ka jingong ka Iingkashari, kum kine ki kam beain la i kumba ki dei kiba pyniaid da ki briew na Assam.
U Shailendra Kumar Sharma ula aiti ia ka jingujor hapoh ka Basistha Police Station, Guwahati ha ka 30 tarik Jylliew, ba don uwei u briew ba kyrteng u Balwant Bhama, u ‘Kingpin” ha ka jingpyniaid beain ia ki karkhana coke ha Meghalaya, ula phone ia u haduh arsien ha ka step 30 tarik Jylliew bad wan ruh marmet sha ka Iingsah ha kane ka step ban byrngem byrsit ia u nongmudui lada u dang iai bteng ia ka jingiakhun mukotduma.
U Advocate General ka Jylla ruh ula kdew ia ka kaiphod ba 3 tarik Naitung bala file da u Director General of Police (DGP) ka Jylla Meghalaya ba u Youdishthra Bhaman, uba dei u trai jong ka M/S Kalyani Fuel Limited, Shallang, u dei u Khun jong u Balwant Bhama, ia uba u nongmudui mukotduma ula ujor pyrshah.
