Imphal, K’lyngkot 18: Ka Sorkar Pdeng kala phah ia ki Dhruv Chopper sha Imphal ban kit ia ki shipai sha ka sor Moreh kaba don ha khappud, namar ka jingnang jur ka jingiather kuli hapdeng ki bor pahara bad ki kynhun kaikhlaw Kuki ha kane ka sor.
Kat kum ka khubor, ka jingiather kuli kaba jur kala mih hynnin ka miet ha Moreh bad la iathuh ba lai ngut ki shipai BSF kila mynsaw jur.
Ka Sorkar Jylla kala pynjari da ka korphiw ba pura ha Thoubal District namar ka jingjia iather kuli bad ki kaikhlaw ka bym kut.
Hynnin ka miet, ki paidbah kila leit thombor ia ki bor pahara ha Thoubal kynthup ruh ia ka Police Headquarter bad ka Iingsah u Superintendent of Police.
Kane kala jia hadien ka jingiather kuli ha Moreh, kaba lam sha ka jingiap jong ki arngut ki Pulit Commando hynnin ka step bad pynmynsaw ia 2 ngut nalor ki riew paidbah kiba shei kuli.
Ka khubor ka iathuh ba ki paidbah da ka jingbitar ia ki bor pahara, kila leit ban thombor ia ka Police Headquarter ka 3rd Indian Reserve Battalion kaba don ha Khangabok, Thoubal District haduh ba ki Pulit kila hap ban pyndonkam ia ka bor ban tehlakam.
La iathuh ba katba ka jingiakynad ka dang jur, don ki riewkiengatiar ba iadon bad u paidbah, kila ther kuli sha ki bor pahara bad lain gut ki BSF kila mynsaw na ka jingshei kuli.
Ia kine ki shipai la pynkit noh mar mar sha Hospital ha Imphal ba kin ioh jingsumar.
