Shillong, Jymmang 21 : U Deputy Commissioner ka Ri-Bhoi District Abhilash Baranwal, ula pynphai nia kylla ia ka Executive Committee (EC) ka VPP ha Khasi Hills Autonomous District Council (KHADC) bad ong ba ka Council kala dei ban pynshitom nyngkong eh ia u Nongshimwai jong ka khyrdop ha Umdihar uba la pynieng ia ka khyrdop ha National Highway.
U Deputy Commissioner ula pynshai ba ki bor District kim don eiei pyrshah ia ka KHADC ne ia ka jingbuh khyrdop lum khajna kat kum ka bor ba ka ioh na ka Sixth Schedule ka Riti Synshar ka Ri.
Haba pynshai ia ki jingkynnoh ka KHADC, u Baranwal ula ong ba ka jingkhang tala iaka khyrdop ha Umdihar ka dei kaba la leh kat kum ka jingbthah jong ka Sorkar Jylla bad ka KHADC ruh ka tip bha ia kane ka jingbthah.
Ula ong ba ha u snem 2021, ka Tnad District Council Affairs (DCA) ka Sorkar Jylla kala lum ia ka jingialang bad ki ADC ha kaba la rai ba “Ki ADC hapoh ka Sixth Schedule ki don ia ka bor ban pynieng ia ki khyrdop. Hynrei, kane ka bor kam treikam par ha ki surok National Highway bad ki surok PWD. Ha kane ka rai, ka KHADC ruh kala iadon bynta lang”.
“Hadien kane, da ka jingmynjur lang ki ADC, kaSorkar kala thoh sha baroh ki DC ban pynthikna ba ym dei ban don ki khyrdop ha ki surok NH lane surok PWD” ong u Baranwal haba bynrap “Naba kane ka khyrdop (ha Umdihar) ka don ha surok NH bad surok PWD, ngi la leh ia kaba donkam kat km ka jingbthah jong ka Sorkar Jylla ia kaba ka KHADC ruh ka iadon bynta lang”.
“Kumta kam dei sati aka kam ba long pyrshah ia ka KHADC bad kam don ruh kano kano ka jingbym kheinsnep ia ka KHADC, ka dei beit ka kam bala leh kat kum ki rules ia kaba ka KHADC ka don bynta lang” ula iengskhem ia ka sienjam ba ula shim.
U Deputy Commissioner ula pynpaw ruh ia ka jingsngew ba ka KHADC kala dei ban leh eiei pyrshah ia u agent/nongshim wai ia ka khyrdop uba la pynkhein ia ka kyndon ba ka Council hi ka buh kata “Ki khyrdop kim dei ban don ha ki National Highways/State Highways/PWD rural roads”.
Kat kum ka work order bala ai da ka KHADC ha ka 29 tarik Iaiong, ka kyndon ba 6 kala kren shai ba u nongshimwai um dei ban pynieng ia ka khyrdop ha ka surok Natonal Highway/State Highway bad surok PWD.
“Kan bha shibun jin lada ka KHADC ka leh eiei pyrshah ia u nongshimwai uba la pynthohbria ia ka Council da kaba pynkhein ia ka hukum bala buh ban pyniaid ia kane ka khyrdop ha ka jaka ban kynnoh ia ka Ophis u DC b aka leh donbor…kila dei ban pynshitom ia kum kine ki nongshimwai” ula ban jur.
Halor ka jingpynksan ka KHADC iala ka rai ban pynieng ia ka khyrdop, u Baranwal ula ong “Lada long kumta, ki long laitluid ban iakren ia kane ka kam bad ka Sorkar Meghalaya hynrei ia mynta ka Ophis u DC kala pyntreikam ia ka rai bala shim da ka Sorkar Jylla. Kumba long mynta, ka rai jong ka Sorkar Jylla kala shai bha bad kaba long ruh kat kum ka kyndon ka Sorkar India ba ym dei ban don ki khyrdop ha ki surok PWD lane ki National Highway”.
 ka VPP ha Khasi Hills Autonomous District Council (KHADC) bad ong ba ka Council kala dei ban pynshitom nyngkong eh ia u Nongshimwai jong ka khyrdop ha Umdihar uba la pynieng ia ka khyrdop ha National Highway.){kind=link}